VIQUEQUE, 13 janeiru 2023 (TATOLI)–Xefe suku Liaruka, Filomeno Soares ‘Manu Aman’, husu Governu hadi’a estrada ligasaun bá suku Liaruka, postu administrativu Ossu, munisípiu Viqueque, tanba daudaun ho kondisaun grave.
“Ha’u haree estrada ne’ebé liga mai ha’u-nia suku ho kondisaun grave tebes. Tanba ne’e, husu ba Primeiru-Ministru, Taur Matan Ruak, hodi orienta Ministru Obra Públika hadi’a dalan hodi povu bele asesu no lori produtu ba merkadu, agora dalan hanesan ne’e difikulta movimentu públiku ba suku ne’e,” Líder komunitáriu hateten ba Agência Tatoli, iha sede suku Liaruka, sesta ne’e.
Antes ne’e, bainhira membru Governu sira halo vizita ba suku ne’e, autoridade suku fó hatene ona maibé seidauk rezolve.
“Karik Ministru Obra Públika mai suku Liaruka, ha’u sei hato’o direta tan ba Ministru hodi aselera hadi’a dalan, maibé Ministru la mai. Ha’u husu favór ajuda aloka orsamentu ruma ba ami-nia estrada,” nia akresenta.
Notísia relevante: Membru PN husu Governu loke estrada alternativu ba Viqueque Vila
Iha fatin hanesan, Administradór postu Ossu, Sebastião Freitas Pires, hateten, nia parte sei hato’o proposta ba Servisu Obra Públika Viqueque hodi haree kestaun ne’e no tau ba prioridade.
“Kona-ba problema estrada suku Liaruka, ha’u sei hato’o ba munisípiu Viqueque hodi haree, karik munisípiu la responde maka ha’u ho Xefe suku sei ba hato’o iha ministériu relevante hodi hadi’a dalan atu fasilita komunidade asesu merkadu. Tanba dalan agora difikulta movimentu,” nia tenik.
Tuir observasaun Agência Tatoli iha terrenu, nota katak bainhira tempu udan transporte susar liu tanba kuaze nakonu ho tahu.
Suku Liaruka kompostu hosi aldeia lima hanesan Baha-Neo, Cai-Ua, Liacuda, Liaruka no Selele, ho totál populasaun 1.008 (bazeia ba sesnsu 2015).
Jornalista : Vitorino Lopes da Costa
Editora : Julia Chatarina
