DILI, 13 janeiru 2023 (TATOLI)–Ministru Transporte no Komunikasaun (MTK), José Agustinho da Silva, hateten, ró-ahi Ocean Star bainhira atu sai hosi territóriu Timor-Leste tenke ho kondisaun di’ak, tanba ne’e presiza hadi’a molok sai.
“Diresaun Nasionál Transporte Marrítima (DNTM), iha loron 01 janeiru 2023, relata mai ha’u katak ekipa hosi Indonézia to’o ona iha Timor no sira ho ekipa integradu maka bele haree ró nia kondisaun. Ha’u dehan molok ró na’in atu mai foti, ninia kondisaun tenke di’ak no seguru lai depois maka fó orientasaun hodi ró ne’e sai,” Ministru dehan ba Agência Tatoli, iha Palásiu Governu, sesta ne’e.
Tanba ne’e, Ministru prefere halo inspesaun, entaun tempu ne’ebá ekipa integradu hamutuk ho tripulante sira ba haree direta kondisaun ró.
Notísia relevante: Niaga Shipping hadi’a ona ró Ocean Star ne’ebé ‘para’ kleur
“Ró ne’e hadi’a ona no funsiona ona, maibé ahi sira mak durante ne’e mate lakan. Espera katak tempu badak bele desloka. Ida-ne’e ha’u konsidera progresu fasilita ema-nia ró karik hakarak lori bá. Kona-ba problema negósiu ne’e sira-nia problema, maibé ita só tau atensaun maka ró ne’e ninia seguransa inklui tripulante sira,” nia akresenta.
Aleinde ne’e, tuir Ministru, kona-ba taxa, bainhira para iha área juridisaun tasi Timor, obrigatóriu tenke kumpre, tanba ne’e Ministru orienta DNTM no Autoridade Portuáriu Timor-Leste (APORTIL) atu haree asuntu ne’e.
“Ha’u orienta asuntu ne’e tuir prosedimentu legál no regra ne’ebé maka vigora. Ita presiza orienta sira ne’ebé tama iha ita-nia área jurisdisaun tasi Timor nian. Informasaun atuál hosi diresaun katak, ró ne’e hadi’a ona no tempu badak finaliza hodi desloka ba sira-nia nasaun orijen. Kona-ba problema seluk sei rezolve entre empreza ho empreza no Governu,” nia tenik.
Governante ne’e tau importánsia atu ró ne’e bainhira sai hosi Timor-Leste ho kondisaun di’ak, tanba bainhira autoriza ró sai ho kondisaun ladi’ak no akontese buat ruma ladi’ak durante viajen, kulpa sei mai fali Timor. Tanba ne’e presiza evita lori risku ba Estadu.
Ministru mós konta katak, ró ahi Ocean Star mai Timor ho durasaun tempu kleur, iha tinan kotuk tripulante sira halo esforsu ho Embaixada Indonézia iha Timor-Leste no ikus mai konsege mobiliza tripulante sira bá Indonézia, ne’ebé iha empreza ida naran Nezia Edirma mak lori ró ne’e mai depois tempu ne’ebá abandona.
“Sira la fó hahán ba ema no ró-ahi ne’e mós iha laran ho kondisaun ladi’ak, tempu ne’ebá preokupadu tebes. Ha’u orienta ekipa integradu tuun, entaun konsege mobiliza tékniku sira bá otél molok haruka sira ba nasaun orijen. Agora ha’u halo esforsu hodi bolu sira ba Ministériu, hanesan na’in ba ró no empreza ne’ebé lori ró ne’e mai Timor inklui empreza ida tan. Ha’u bolu sira, tempu ne’ebá ha’u dehan katak ró ida ne’ebá tripulante laiha, ha’u la hatene bainhira mak ró ne’e atu mout, momentu ne’ebá situasaun ida grave tebes. Ha’u preokupa ho situasaun ida-ne’e,” nia relembra.
Ró-ahi Ocean Star tama mai Timor-Leste iha loron 04 abril 2021, daudaun sei nafatin para iha área tasi Timor.
Jornalista : Antónia Gusmão
Editora : Julia Chatarina
