iklan

EKONOMIA, HEADLINE

Niaga Shipping hadi’a ona ró Ocean Star ne’ebé ‘para’ kleur

Niaga Shipping hadi’a ona ró Ocean Star ne’ebé ‘para’ kleur

Diretór Nasionál Transporte Marrítima, João de Fátima Fernandes, hatudu hela dokumentu hosi empreza PT Niaga Shipping International, iha ninia knaar fatin, Motael, kinta (05/01). Imajen Tatoli/Antónia Gusmão

DILI, 05 janeiru 2023 (TATOLI)–Empreza PT Niaga Shipping International hosi Indonézia haruka ona tékniku no tripulante hamutuk 14 hodi hadi’a ró Ocean Star ne’ebé mai hosi Indonézia iha loron 04 abril 2021, ne’ebé to’o agora para de’it iha tasi-laran iha área Lecidere.

“Hafoin liuhosi prosesu naruk ida, ikus mai sira (empreza) lori ona tripulante hamutuk 14 no daudaun iha hela ró-ahi leten atu halo manutensaun. Ekipa ne’e mai iha loron 27 dezembru 2022, maibé iha loron 31 dezembru hamutuk ho Unidade Polísia Marítima halo observasaun direta ba kondisaun ró, ne’ebé hosi rezultadu observasaun hatudu katak ró iha buat barak mak ladi’ak no avaria. Tanba ne’e maka ekipa ne’e presiza hela iha ró laran atu halo manutensaun,” Diretór Nasionál Transporte Marrítima, João de Fátima Fernandes, informa ba Agência Tatoli, iha ninia knaar fatin, Motael, kinta ne’e.

Antes ne’e, mosu problema entre empreza ne’ebé lori ró mai Timor-Leste no empreza ró na’in, PT Niaga Shipping International.

Kona-ba selu tasa, bazeia ba konkordánsia hosi instituisaun relevante sira deside katak halo manutensaun ró-ahi ne’e to’o ramata tiha no asegura hodi muda mai iha kuartel Unidade Polísia Máritima (UPM) nia oin, nune’e faze tuir mai mak buka solusaun hodi selu tasa sira.

Notísia relevante: Ró Ocean Star ‘para’ durante tinan-rua ona iha tasi-laran

Empreza sei selu tasa ba Alfándega, Autoridade Portuáriu Timor-Leste (APORTIL), inklui Ajénsia Ariana.

“Maibe solusaun dahuluk mak asegura ró ne’e nia kondisaun, faze tuir mai tenke rezolve administrasaun tanba dokumentu balun mate ona. Ami rekomenda bainhira rezolve ona asuntu sira ne’e, tenke lori ró ne’e ba Indonézia hodi halo manutensaun lai mak bele halo atividade. Karik la selu, bazeia ba informasaun ne’ebé ha’u rona hosi Alfándega katak, loron 90 mak empreza labele selu tasa signifika sasán ne’e pertense ba Estadu. Ró ne’e liuhosi prosesu normál katak legál,” nia akresenta.

Diretór Nasionál esplika tan, empreza Nizia Edirma, Edison da Costa Varela, mak responsabiliza ba ró Ocean Star ne’e. Antes ne’e Diresaun Nasionál Transporte Marrítima (DNTM) sujere ba empreza katak ró-ahi hotu ne’ebé to’o mai no halo atividade iha territóriu tasi Timor tenke iha reprezentante ida, tanba ne’e mak empreza Ariana International hola responsabilidade ba ró.

Ró ne’e to’o iha Dili iha loron 04 abril 2021, ne’ebé iha loos tempu inundasaun no iha hela COVID-19 nia laran, ne’ebé iha loron 13 mak sira halo inspesaun.

“Prosesu hotu la’o normál, ne’ebé iha momentu ne’ebá prosesu la’o ho di’ak maibé tanba de’it iha fallansu kiik ida ne’ebé mosu entre empreza Nizia Edirma ho empreza PT Niaga Shipping International, Nia Wulandari, ne’ebé sira halo kontratu ba malu katak, ró-ahi ida-ne’e ninia parte tenke responsabiliza hosi empreza Nizia Edirma, ne’ebé hanesan na’in ba empreza refere maka Edison da Costa Varela, katak empreza ne’e tenke selu saláriu, fó han ba ekipa no hatama bee no kombustível maibé realidade katak laiha solusaun ba informasaun hirak ne’e, katak abandona ró-ahi ne’e no la fó han ekipa, entaun tripulante sira hato’o informasaun ba sira-nia embaixada Indonézia iha Timor-Leste, hafoin ne’e apoia aihan ba ekipa durante loron-rua, ekipa sira ne’e mós la simu ona saláriu fulan-haat ona,” nia konta tuir.

Tanba ne’e, sira abandona kedas ró-ahi ne’e iha juñu 2021, maibé na’in ba empreza Edison rasik promete katak, hato’o rasik iha DNTM katak atu lori fali tripulante mai iha ró-ahi ne’e iha janeiru 2022 maibé realidade tinan-ida resin ona laiha informasaun.

“Ho ida-ne’e ró-ahi ida ne’e nafatin abandona, entaun DNTM haree ida-ne’e risku tebes, tanba Timor-Leste nu’udar membru IMO (International Maritime Organization) no ratifika ona konvensaun Salvaguarda ba ema-nia vida iha tasi (SOLAS-International Convention for the Safety of Life at Sea), ne’e atu haree ba kondisaun seguransa no kontinua halo atividade. Tanba ne’e maka ema tenke mantein nafatin iha ró-ahi laran tuir ninia kompeténsia sertifikadu ne’ebé iha atu asegura servisu iha ró-ahi hodi prevene ró iha risku-nia laran,” Responsável Transporte Marrítima ne’e esklarese.

Tanba ne’e, DNTM nu’udar órgaun reguladora sujere nafatin atu koordena de’it ho empreza Ariana Oceano atu nune’e bele buka solusaun, maibé ajénsia rasik mós la fó informasaun serteza, tanba nia mós liga ba na’in ró maibé la konsege komunika buat ruma.

Nune’e, iha loron 10 outubru 2022, reprezentante empreza PT Niaga Shipping International mai hola responsabilidade no iha loron 19 novembru 2022 foti inisiativa hodi koordena ho ajénsia ho DNTM hodi hasoru Ministru Transporte no Komunikasaun, José Agustinho da Silva, hodi hetan autorizasaun molok ba halo inspesaun direta ba ró-ahi nia kondisaun tanba para iha tasi laran durante tinan-ida resin.

“Ho razaun ne’e maka sira-nia karta ho evidénsia forte hodi aprezenta ba Ministru, tanba ne’e maka Ministru autoriza ho despasu hodi halo tuir prosedimentu legál ne’ebé vigór, entaun DNTM hato’o ba reprezentante NSI katak halo karta ida ba ajénsia Ariana atu nune’e ajénsia bele servisu hamutuk ho empreza NSI hodi haree atividade ne’ebé maka normalmente atu halo ajénsia mak sei halo liga ba entidade relevante, ne’ebé daudaun ajénsia Ariana simu pozisaun liga ho empreza NSI,” nia adianta.

Jornalista   : Antónia Gusmão

Editora       : Julia Chatarina

iklan
iklan

Leave a Reply

iklan
error: Content is protected !!