“Postal Voting” fasilita eleitór ne’ebé hela distánsia dook no okupadu

DILI, 13 janieru 2023 (TATAOLI)–Diretór Jerál Sekretariadu Tékniku Administrasaun Eleitorál (STAE), Acilino Manuel Branco, hateten implementasaun ba postal voting ne’e atu fasilita eleitór sira iha rai-liur ne’ebé mak hela distánsia dook no iha balun okupadu ho nia servisu.

Notísia Relevante: STAE-Embaixadór sira diskute implementasaun medida foun eleisaun lejislativa

“Portal Voting hanesan opsaun ida ba eleitór sira iha rai-liur tanba fó oportunidade ba ema-ne’ebé servisu tanba dala ruma eleisaun realiza ema okupadu ho servisu, entaun ho planu implementa portal voting ne’e atu fasilita sira hodi bele ezerse sira-nia dereitu votu,” Diretór Jeráll STAE ne’e hateten ba Agência Tatoli, iha nia kna’ar fatin Caicoli, sesta ne’e.

Acilino esplika katak iha opsaun rua mak nia iha tempu vota prezensiál maibé sidadaun ne’ebé ho motivu servisu, entaun sira vota no aplika liuhusi postal voting no postal voting ne’e akontese semana tolu antes.

“Ha’u hanoin postal voting nia vantajen boot tebes tanba eleitór iha nia fatin no vota liuhosi postal voting de’it. Tanba, ita hotu hatene katak ita-nia maluk timoroan iha rai-li’ur ne’e 90% halo servisu entaun ida-ne’e sei fasilita sira,” nia dehan.

Diretór ne’e esplika, postal voting ne’e uza hotu buletin de votu ne’ebé liuhusi koreiu (hanesan pos da giro) no ida-ne’e fasil organiza, STAE iha perspetiva no planu medida ne’e. Maibé dahuluk eleitór tenke atualiza nia unidade jeográfika ka sidade ne’ebé nia hela bá.

“Bainhira iha tempu atualizasaun mak nia (eleitór) mós tenke deside ona ho razaun katak ha’u okupadu ka hela fatin dook no ha’u hakarak aplika iha postal voting de’it, entaun ita aplika nia ba postal voting,” nia hateten.

Bainhira atu aplika postal voting iha momentu eleisaun mak Governu no Estadu selu ema atu lori envelope ba eleitór nia fatin no iha envelope ida nia-laran ne’e, bainhira loke sei haree kona-ba instrumentu oinsá atu vota iha postal voting no iha envelope ida eleitór tau nia kartaun eleitorál hodi haruka liuhosi koreiu ne’e.

“Depois iha envelope kiik oan ida iha laran ne’e envelope segredu ne’ebé mak buletin de votu iha laran depois mak eleitór foti hodi vota,” nia dehan.

Husu kona-ba orsamentu aloka ba planu postal voting, nia hatán, ne’e Ministériu Negósiu Estrajeiru no Koopersaun (MNEK) nia kompeténsia.

“Alokasaun orsamentu ba iha eleisaun antes ne’e inklui ona ho osan ne’ebé Governu prevee. Maibé eleisaun parlamentu ida-ne’e, ita-nia Governu liuhosi Ministériu Finansa rasik ba eleisaun nian no ba mós MNEK para operasionaliza prosesu sira-ne’e. Maibé, tuir lei resensiamentu eleitorál dehan kustu ba prosesu sira-ne’e hotu kompeténsia MNEK nian,” nia hateten.

Nia dehan, kestaun osan ne’e laiha problema maibé presiza mak halo ajustamentu tuir nesesidade kada nasaun nian.

“Tanba ne’e iha últimu enkontru ne’ebé mak halo liuhosi virtual ne’e, tantu hosi MNEK no ami rasik husu para kada embaixada ka konsuladu sira atu hatama sira-nia planu. Planu atu selu traballadór ka selu koreiu ba-mai selu hira ba ema ida-nian, nune’e halo kedas despeza ba koreiu nian no ita halo kálkulu. Nune’e, ami husu, iha semana oin ne’e ami tenke simu ona rezultadu,” nia esplika.

Jornalista : Osória Marques

Editór       : Cancio Ximenes