OE-CUSSE, 12 janeiru 2023 – Eis Primeiru Ministru (PM), Kay Rala Xanana Gusmão sei koordena ho emprezáriu sira iha Rejiaun Administrativa Espesiál Oé-Cusse Ambeno (RAEOA) apoia ekipamentu pezadu hodi normaliza mota Tono ne’ebé sobu abitante nia uma iha aldeia Nunuhenu, suku Cunha, sub-rejiaun Pante Makasar.
Eis Prezidente Repúblika ko’alia asuntu ne’e hafoin udan-boot ne’ebé akontese iha loron 24 dezembru 2022 kalan, halo mota Tono sobu komunidade nia uma 10 inklui uma-lulik Nunuhenu no rate lubuk ida iha semitériu públiku hetan estragu tanba erozaun.
Komunikadu imprensa ne’ebé Agência Tatoli, asesu sesta ne’e katak, Xanana Gusmão tún direita hodi rona komunidade sira-nia preokupasaun kona-ba dezastre naturál ne’ebé akontese iha loron 24 dezembru 2022 liubá.
Ne’e duni Xanana Gusmão sei koordena ho emprezáriu Oe-Cusse oan sira atu apoia ekipamentu pezadu hodi solusiona preokupasaun ne’ebé komunidade sira enfrenta nune’e mota labele sobu beibeik abitante sira-nia uma iha tempu udan.
“Ha’u sei ko’alia ho ita-nia setór privadu Oe-Cusse oan atu normaliza de’it mota dalan,” Xanana Gusmão espresa ba abitante sira iha suku Cunha.
Durante hala’o vizita, Xanana Gusmão hamutuk ho komunidade sira hala’o mós serimónia rituál agradesimentu no husu lisensa ba naturaza nune’e mota labele sobu beibeik abitante sira-nia uma.
Iha vizita ne’e, Olinda Maria Ribeiro da Cruz nu’udar abitante informa ba líder karizmátiku ne’e katak, udan tau loron tomak iha loron 24 dezembru 2022 liubá, iha momentu preparasaun sarani sira atu ba misa Natál nian.
“Udan kuaze loron tomak iha 24 dezembru to’o kalan boot mota Tono tún sobu tiha bronjong no kontinua mai sobu ami-nia uma to’o rate sira iha semitériu laran mós mota sobu hotu,” Olinda Maria haktuir ba Xanana Gusmão.
Hafoin abitante Nunuheu enfrenta situasaun ne’e, konsege hetan apoia umanitária hanesan foos, mina no ai-han seluk tán hosi ekipa apoia umanitária Kay Rala Xanana Gusmão no Cruz Vermelha Timor-Leste (CVTL).
“Ami foin simu apoiu hosi maun boot Xanana ho Cruz Vermelha, maibé autoridade RAEOA to’o agora seidauk fó apoiu ruma no seidauk koloka ekipamentu ruma atu mai normaliza mota dalan,” abitante ne’e espresa.
Xefe suku Cunha, Domingos Seco Caunan preokupa inunadasaun ba dala-rua ona, dahuluk akontese iha loron 04 abríl 2021 no agora akontese tan.
“Mota mai sobu dala-rua ona, maibé to’o agora autoridade RAEOA mai promote atu hadi’a no harii fali uma komunidade nian no dehan atu lori apoiu mai, maibé too agora sira la mai,” xefe suku ne’e relata ba Prezidente partidu CNRT ne’e.
Nia dehan, importante liu maka autoridade RAEOA presiza koloka ekipamentu pezadu atu normaliza uluk mota nia dalan hodi evita mota labele kontinua sobu abitante sira-nia uma no natar.
Notísia relevante: Vítima inundasaun 33 iha Oé-Cusse simu ona nesesidade bázika
Jornalista: Abílio Elo Nini
Editór: Evaristo Soares Martins
