Benefisiáriu bolsa da mãe atuál kondisionál 48.000 sei simu subsídiu
DILI, 16 janeiru 2023 (TATOLI)–Diretór Nasionál Direitu Promosaun Ema ho Defisiénsia (DNDPED) iha Ministériu Solidariedade Sosiál no Inkluzaun (MSSI), Mateus da Silva, dehan, benefisiáriu ba programa bolsa da mãe atuál kondisionál ne’ebé rejistu iha MSSI hamutuk 48.000 sei simu subsídiu iha janeiru ne’e.
“Benefisiáriu bolsa da mãe atuál kondisionál ba janeiru ne’e, ita sei selu ema hamutuk 48.000 iha territóriu Timor-Leste,” Mateus da Silva hateten ba Agência Tatoli liuhosi telefónika, segunda ne’e.
Hosi benfisiáriu 48.000 ne’e, MSSI sei gasta osan hamutuk $240.000 hodi halo pagamentu dahuluk ba iha tinan ida-ne’e nian.
Diretór Nasionál Asisténsia Sosiál (DNSA), Lucas Tois, hateten subsídiu bolsa da mãe atuál ne’ebé hahú implementa iha 2012 ne’e atu sustenta família vulneravél ho kada benefisiáriu fulan ida simu $5 no tinan ida $60.
“Família ida labarik liu ema na’in-tolu mak rejista, entaun MSSI liuhosi dirasaun DNSA sei fó de’it ba ema na’in-tolu ho totál $180 tinan ida,” nia dehan.
Maibé, tuir Diretór Administrasaun Finansa, Rui Manuel Gago Exposto, hateten bolsa da mãe atuál ne’e bainhira implementa mak iha impaktu boot entaun automatikamente sei esklui mesak tanba bainhira implementa mak laiha impaktu hosi programa bolsa da mãe ne’e, atu haree ba iha ema-ne’ebé konsidera vulneravél ekonómika no sosial hodi fó subsídiu, no hahú iha 2008 ho programa pilotu iha implementa munisípiu no postu administrativu hotu-hotu to’o agora.
Tuir Dekretu-Lei 14/04/2012, ho objetivu atu promove labarik hosi tinan 0-17 liu-liu atu asesu ba eskola mínimu frekuente to’o eskola sekundária no asesu saúde.
Notísia Relevante: MSSI prevee $5,394.120 ba programa bolsa da mãe atuál kondisionál
Jornalista : Osória Marques
Editór : Cancio Ximenes
