DILI, 16 janeiru 2023 (TATOLI)— Faviola de Jesus Andrade no Martinho Araújo nu’udar manán na’in ba kompetisaun Festival Fashion Show 2023 ne’ebé organiza hosi Ministériu Turizmu, Komérsiu no Indústria (MTKI) hamutuk ho dezenista (designer) moda nasionál ne’ebé realiza iha Portu Dili, domingu (15/01) kalan.
Bazeia ba nota komunikadu ne’ebé Agência Tatoli, asesu segunda ne’e, eventu kompetisaun Moda Fashion ne’e rasik, partisipa joven na’in 43, hosi númeru ne’e na’in 12 maka hakat ba faze finál ne’ebé halao iha loron domingu (15/01), hafoin aprezenta, ekipa juri hili na’in ualu mak sai manán na’in ba kompetisaun Fashion Show refere.
Hosi manán na’in ualu ne’e fahe ba rua ekipa feto no mane. Nune’e, hosi ekipa feto manán na’in dahuluk mak, Faviola de Jesus Andrade ho valór 237 no simu osan $800. Tuir kedan Estefania Barreto de Araujo ho valor 221 ($600), manán na’in datolu Lofia Duarte Noronha Freitas ho valor 212 ( $400). No ikus mak Nayra Imaculada Fernandes nu’udar manán na’in favoritu ho valór 201 no simu osan $200.
Notisia relavante : MTKI halo abertura ba atividade Fashion Show ba joven 40
Parte seluk, hosi manán na’in kategori mane, primeiru lugar monu ba Martino Araújo ho valor 236 no simu osan $800. Tuir kedan, manán na’in daruak, Alexandre Magno ho valor 216 ($600). Manán na’in da-tolu monu ba Sergio de Araújo ho valor 214 ($400). Ikus mak Joaquim Amaral nu’udar manán na’in favoritu hetan valór 207 no simu osan $200.
Kompetisaun Fashion Show ne’e rasik, aleinde manán na’in sira hetan prémiu osan, hetan mós tasa inklui sertifikadu rekoñesementu.
Ministru Turizmu, Komérsiu no Indústria (MTKI), José Lucas do Carmo da Silva, lori VIII Governu nia naran hato’o parabéns ba konkorentes Fashio Show 2023, no dezenista sira, artista no modelu ho komisaun organizadora festival Kompetisaun Fashion Show 2023.
“Lori MTKI no Governu nia naran hato’o parabéns ba konkorente Fashion Show, sira. Mai ita hamutuk promove tais nu’udar produtu nasionál Timor-Leste, ho modelu hatais tais di’ak ba na’in, hatais tais Di’ak ba Bainaka,” José Lucas do Carmo da Silva, hateten.
Manán na’in Faviola de Jesus Andrade, nia parte hato’o agredese ba Governu liuhosi MTKI tanba bele organiza kompetisaun Fashion Show entre foinsa’e sira hodi hatudu sira talentu liu hosi hatais tais.
“Ha’u agradese no orgullu ba Komisaun Organizadora ne’ebé organiza programa ida ne’e kapas tebes, espera kontinua nafatin atu nune’e joven sira seluk mós bele hatudu sira nia talentu, modeling no atividade sira seluk, no iha atividade fashion show ida ne’e tais ne’ebé ha’u uza hosi munisípiu Bobobaroi nian,” nia dehan.
Manán na’in seluk, Martino Araújo, nia parte mós hato’o agradese ba MTKI ne’ebé iha inisiativa loke kompetisaun ne’e bele fó oportunidade ba joven sira partisipa hodi hatudu sira-nia kriatividade.
“Ha’u kontenti tebes tanba preparasaun durante ne’e, gasta enerjia finalmente selu duni no hetan primeiru lugar, hanesan foinsa’e ida ha’u bele esplora ha’u-nia kreatividade liu hosi arte no kultura. Ha’u senti katak agora dadaun ne’e tempu ona joven sira hamriik hamutuk esplora ita-nia talentu ida-idak la hare ba problema ne’ebé mak iha,” nia dehan.
Jornalista : Arminda Fonseca
Editora : Armandina Moniz
