DILI, 16 janeiru 2023 (TATOLI)—Prezidente Repúblika (PR), José Ramos Horta, segunda ne’e, ho delegasaun dezloka ba Suísa hodi partisipa iha forum ekonómiku mundiál.
“Ha’u ba Suísa, ba tuir “World Economic Forúm”. Ha’u hetan konvite balun ona iha ne’ebá, ema lubun ida iha mundu ba iha World Economic Forum ne’ebá kada tinan. Tinan ida-ne’e, ha’u hetan konvite hosi Prezidente World Forum Economic, Børge Brende,” Xefe Estadu ne’e hateten liu-hosi komunikadu imprensa ne’ebé Agéncia Tatoli asesu, segunda ne’e.
Ba Prezidente Repúblika, eventu internasionál ne’e hanesan oportunidade hodi halo promosaun ba potensialidade turístika iha Timor-Leste.
“Nu’udar distinu turístiku, promosaun ba Timor nia produtu no seluk tan. Ha’u hakarak haree forte liután ita-nia kafé, nia tama halo publisidade. Ha’u halo promosaun makaas loos iha mundu, Timor nia kafé,” Horta hateten.
Iha Suísa, Prezidente Repúblika José Ramos Horta sei hasoru malu mós ho alta entidade hosi nasaun oioin no investidór balun, hodi ko’alia kona-ba programa kooperasaun iha área oioin.
Prezidente Repúblika, José Ramos-Horta, ho delegasaun sei fila-fali mai Timor-Leste iha loron 21 fulan-janeiru 2023.
Antes ne’e, Parlamentu Nasionál (PN) aprova ajenda vizita Prezidente Repúblika ba Brazíl no Suísa iha loron 19 fulan-dezembru tinan 2023, ho votu a-favór 46, kontra no abstensaun 0.
Notísia Relevante: PN autoriza viajen PR Horta ba Brazíl no Suísa
Jornalista : Nelson de Sousa
Editór : Cancio Ximenes
