DILI, 17 janeiru 2023 (TATOLI)–Diretór Jerál Sektretariadu Tékniku Administrasaun Eleitorál (STAE), Acilino Manuel Branco, apela ba sidadaun Timor-Leste atu partisipa másima iha prosesu Resensiamentu Eleitorál no Atualizasaun Baze Dadus (RE-ABD), nune’e kartaun eleitorál bele atualizadu hodi partisipa iha eleisaun parlamentár 2023.
Notísia Relevante: STAE fó formasaun ba operadora sistema 130-resin atende resensiamentu eleitorál
“Apela ba públiku tomak katak tinan ne’e ita iha eleisaun parlamentár no tuir konstituisaun katak ita tenke halo no atualizsaun baze dadus, nune’e hahú aban halo lansamentu iha Dili maibé iha territóriu nasionál, nível postu administrativu no mós munisípiu Ataúro ne’ebé sei hala’o hikas resensiamentu eleitorál hodi hasoru eleisaun parlamentár. Tanba ne’e mak husu ba sidadaun tomak liuliu ba sira-ne’ebé atinje ona idade 17, karik ba rejistu no mós atualizasaun baze dadus, muda fatin ka kartaun eleitorál tohar ka lakon, nune’e ita-nia kartaun atualizadu atu bele ezerse ita-boot sira-nia direitu votu iha eleisaun lejislativa,” Diretór Jerál STAE ne’e apela liuhosi programa Entrevista Eksluziva ne’ebé hala’o iha studio Agência Tatoli, Faról, segunda ne’e.
Nune’e mós. Nia husu husu ba sidadaun timoroan iha diáspora katak fulan ida rua tan ka iha fulan marsu 2023 ne’e, ekipa tékniku hosi Sekretáriadu Tékniku Administrasaun Eeleitorál (STAE) sei to’o iha imi-nia fatin hodi halo resensiamentu eleitorál no ahalo atualizasaun baze dadus.
“Ba sira-ne’ebé hela iha rai-li’ur atu pasiénsia tanba ami sei esforsu no iha fulan ida rua mai tan ami sei to’o ita-boot sira-nia fatin hodi halo resensiementu eleitorál no atualizasaun baze dadus,” nia dehan.
Dala ida tan, nia husu ba públiku atu partisipa bá, nune’e labele lakon direitu iha eleisaun importante iha tinan ne’e.
Númeru eleitór to’o iha fulan-dezembru 2022 hamutuk 878.712 ne’ebé kompostu hosi Aileu 34.706, Ainaro 46.945, Ataúro 2.600, Baucau 98.629, Bobonaro 72.811, Cavalima 48.830, Dili 192.934, Ermera 84.361, Lautém 49.380, Liquiça 51.925, Manatuto 35.999, Manufahi 41.574, RAEOA 53.151 no Viqueque iha eleitór hamutuk 58.867.
Nune’e mós, eleitór ne’ebé agora resensiadu no atualizadu iha diáspora hamutuk 6.944 ne’ebé kompostu hosi Austrália iha eleitór hamutuk 1.462, Korea Súl 1.237, Irlandia do Norte 2.185, Portugál 1.241 no Reinu Unidu iha eleitór hamutuk 819
Notísia Relevante: Eleisaun lejislativa: STAE sei estabelese sentru votasaun 237-estasaun votasaun 320-resin
Jornalista : Osoria Marques
Editór : Cancio Ximenes
Oinsa ho votação paralela? sei iha ka lae? se iha karik, bainhira mak ema sira nebe sei iha kapital bele halo registu? no nia prosedimentu detalhu hodi registu ba votação paralela?
Se bele karik, Tatoli hela kestaun ida nee, obrigada wain.