VIQUEQUE, 17 janeiru 2022 (TATOLI)- Sekretáriadu Tékniku Administrasaun Eleitorál (STAE) munisípiu Viqueque, tersa ne’e, halo lansamentu resensiamentu eleitorál no atualizasaun baze dadus (RE-ABD), nune’e eleitór sira bele atualiza nia kartaun eleitorál hodi partisipa eleisaun parlamentár 2023.
“Ohin, STAE hosi munisípiu hotu-hotu inklui munisípiu Viqueque halo lansamentu ba resensiamentu eleitorál hodi nune’e prepara ba eleisaun Parlamentár iha tinan ida-ne’e. Hodi hein Prezidente Repúblika dekreta kalendáriu”, Diretór STAE Viqueque, Humberto Fernandes, hateten ba jornalista sira, hafoin ramata lansamentu eleitorál iha edifísiu STAE Viqueque.
Notísia Relevante: STAE fó formasaun ba operadora sistema 130-resin atende resensiamentu eleitorál
Órgaun eleitorál hala’o resensiamentu eleitorál atu sidadaun hotu-hotu liuliu eleitór sira iha munisípiu Viqueque hodi bele ezerse sira-nia direitu votu iha eleisaun lejislativa.
“Iha resensimentu ne’e, ami sei halo atendementu ba eleitór foun, kartaun eleitorál lakon, kartaun tohar no atualiza kartaun sira ne’ebé muda fatin atu sira bele partisipa iha eleisaun parlamentár”, nia akresenta.
Prosesu resensiamentu eleitorál iha munisípiu Viqueque, ekipa STAE destaka mós ekipa tékniku na’in-rua ba iha postu adiministrativu lima hanesan Uatucarbau, Lacluta, Ossu, Uatulari no Viqueque vila hodi halo atendementu ba populasaun.
“Tanba horiseik, ami halo ona distribuisaun materiál hanesan komputadór no mákina imprime eletorál ba iha postu sira hodi prodús ita-nia eleitór sira-nia eleitorál, nune’e eleitor sira la presiza hakaat mai munisípiu”, katak.
Tuir kalendáriu prosesu resensimentu eleitorál hahú fulan janeiru to’o fulan juñu 2023. Kritériu trata kartaun eleitorál mak sidadaun sira lori dokumentu hanesan Billete Identidade no sertidaun moris.
Tanba ne’e, Diretór STAE Munisípiu Viqueque ne’e husu ba sidadaun sira ho idade elizivél iha munisípiu Viqueque hakbesik-an ba fatin resensiamentu hodi trata kartaun eleitorál.
Totál eleitór atulizadu iha munisípiu Viqueque nian hosi tinan 2022 hamutuk 58.867, kompostu hosi feto hamutuk 28.939 no mane hamutuk 29.928. Iha eleisaun Prezidente Repúblika 2022 eleitór hosi munisípiu Viqueque partisipa eleisaun hamutuk 58.565.
Enkuantu, Númeru eleitór iha territóriu nasionál to’o iha fulan-dezembru 2022 hamutuk 878.712 ne’ebé kompostu hosi Aileu 34.706, Ainaro 46.945, Ataúro 2.600, Baucau 98.629, Bobonaro 72.811, Cavalima 48.830, Dili 192.934, Ermera 84.361, Lautém 49.380, Liquiça 51.925, Manatuto 35.999, Manufahi 41.574, RAEOA 53.151 no Viqueque iha eleitór hamutuk 58.867.
Nune’e mós, eleitór ne’ebé agora resensiadu no atualizadu iha diáspora hamutuk 6.944 ne’ebé kompostu hosi Austrália iha eleitór hamutuk 1.462, Korea Súl 1.237, Irlandia do Norte 2.185, Portugál 1.241 no Reinu Unidu iha eleitór hamutuk 819
Partisipa iha serimónia lansamentu resensiamentu eleitorál nmak Adjuntu Sekretáriu munisípiu akompaña hosi Diretór Komisaun Nasionál Eleisaun (CNE-sigla portugés) munisípiu Viqueque no Komadante PNTL munisípiu Viqueque inklui ekipa tékniku órgaun eleitorál.
Notísia Relevante: Eleisaun lejislativa: STAE sei estabelese sentru votasaun 237-estasaun votasaun 320-resin
Jornalista: Vitorino Lopes da Costa
Editór : Florencio Miranda Ximenes
