Aban, komisaun A halo audiénsia públika alterasaun lei Eleitorál ba PN
DILI, 18 janeiru 2023 (TATOLI)—Komisaun A trata asuntu Justisa no Konstituisional iha Parlamentu Nasionál (PN), kinta (19/01) aban, hahú halo audiénsia públika proposta alterasaun lei Eleitorál ba Parlamentu Nasionál.
Notísia Relevante: Governu introdús medida foun iha Lei Eleitorál hodi aumenta partisipasaun
“Ajenda aban, komisaun hahú halo audiénsia públika alterasaun lei Eleitorál Parlamentu Nasionál, nune’e sei konvida partidu polítiku, órgaun eleitorál CNE, STAE, Supremu Tribunál Justisa, Ministéiru Administrasaun Estatál (MAE),” Prezidente komisaun A, Joaquim dos Santos, informa ba jornalista sira iha PN, kuarta ne’e.
Tan ne’e, deputadu sira iha komisaun, kuarta ne’e hala’o briefing antes hala’o audiénsia públika, ne’ebé sei fó prioridade ba diskusaun tanba liga ho eleisaun parlamentár besik ona.
Maske nune’e, Prezidente komisaun A ne’e seidauk esplika detallu matéria alterasaun maibé adianta katak sei iha artigu tolu mak altera.
Antes ne’e, Governu liuhosi reuniaun Konsellu Ministru (KM), Ministru Administrasaun Estatál, Miguel Pereira de Carvalho, aprezenta ba alterasaun dalimak ba lei númeru 6/2006, loron 28 dezembru, ne’ebé aprova lei Eleitorál ba Parlamentu Nasionál.
Proposta ne’e hakarak atu introdús iha Lei Eleitorál ba Parlamentu Nasionál, inovasaun sira ne’ebé introdús ona iha tinan 2011 iha lei Eleitorál ba Prezidente Repúblika, hodi mantein armonizasaun regra sira kona-bá prosesu eleitorál iha órgaun soberanu ne’e.
Inisiativa ne’e, inklui mós iha ho regra foun sira kona-ba oráriu funsionamentu sentru votasaun, lisensa ba jornalista iha servisu kobertura jornalístika eleisaun parlamentár nian, sira vota iha sentru votasaun ne’ebé besik liu iha sira-nia serbisu fatin, obrigatoriedade eleitór sira hodi identifika-an bazea ba dokumentu identifikasaun pesoál ne’ebé valídu ka kriasaun figura monitór eleitorál ne’ebé ninia funsaun hanesan ho observadór eleitorál sira.
Norma balun mós hadi’a, hodi klarifika katak iha asembleia apuramentu nasionál CNE deside ho definitivamente kona-ba votu nulu sira no elementu sira-ne’ebé tau iha buletin votu inklui inkluzaun númeru orden hosi kada kandidatura rezultadu hosi sorteiu lista kandidatura sira.
Aleinde ne’e, adota inovasaun prinsipál ida hosi eleisaun prezidensiál tinan 2021 mak hanesan sentru votasaun paralelu sira, maske ho forma foun nune’e prevee atu instala sentru votasaun paralelu 13 iha Dili, ne’ebé ida-idak asosia ba munisípiu ida no ba Rejiaun Administrativa Espesiál Oé-Cusse Ambeno (RAEOA).
Sidadaun eleitór sé de’it ne’ebé inskreve ona iha unidade resensiamentu fora hosi Dili, no ema-ne’ebé la hakarak atu ba vota iha ninia sentru votasaun orijinál rasik, bele inskreve iha sentru votasaun paralelu sira-ne’e.
Jornalista : Nelson de Sousa
Editór : Cancio Ximenes
