COVALIMA, 18 janeiru 2023 (TATOLI)–Sekretariadu Tékniku Administrasaun Eleitorál (STAE) Covalima, sei rekruta brigada na’in- 100 hodi prepara ba eleisaun parlamentar tinan 2023.
Notísia Relevante: STAE presiza brigada-ofisiál eleitorál rihun 19-resin iha eleisaun parlamentár
“Sekretáriadu Tékniku Administrasaun Eleitorál, dadaun ne’e fó sai ona avizu, ami atu halo rekrutamentu ba brigada na’in-100 hodi prepara ba eleisaun parlamentár,” Diretór STAE Covalima, Francisco Gusmão, informa ba Agência Tatoli iha Kampung Baru, kuarta ne’e.
Razaun atu rekruta brigada na’in-100 ne’e tanba foin lalais ajusta tan sentru votasaun ida iha Eskola Bázika Sentrál 1 2 Belulik Leten, iha postu administrativu Fatumea, ho nune’e preparasaun STAE ba eleisaun sei estabelese sentru votasaun 100.
Tanba ne’e, STAE sei halo rekrutamentu brigada sira bazea ba nesesidade no totál sentru votasaun ne’ebé estabelese iha munisípiu Covalima.
Prosesu rekrutamentu agora STAE foin fó sai avizu iha resintu STAE, nune’e hahú hatama dokumentu iha loron 20 fulan-janeiru to’o 27 janeiru tinan 2023.
Hafoin ekipa sira hosi STAE Covalima sei halo selesaun ba dokumentu ba konkorente ne’ebé mak aplika vaga ne’ebé fó sai liuhosi kuadru avizu STAE Covalima.
Prosesu selesaun dokumentu sei hala’o iha STAE munisípiu ne’ebé hetan apoiu hosi STAE nasionál, nune’e preparasaun eleisaun parlamentár ba tinan 2023, STAE Covalima estabelese sentru votasaun aumenta 20 ho estasaun votasaun ualu (8).
Razaun aumenta sentru votasaun no estasaun votasaun, relasiona iha eleisaun prezidensiál, eleitór barak mak la ezerse sira-nia direitu votu.
Antes ne’e, STAE Covalima estabelese sentru votasaun 80 no estasaun votasaun 92 maibé preparasaun ba eleisaun parlamentár ne’e, STAE aumenta sentru votasaun 20 ho nune’e totál sentru votasaun 100 ho estasaun votasaun 92 aumenta tan ualu (8).
Jonalista : Celestina Teles
Editór : Cancio Ximenes
