BOBONARO, 19 janeiru 2023 (TATOLI) – Komisaun Nasionál Eleisaun (CNE, sigla portugés) Munisípiu Bobonaro planeia halo rekurutmamentu ba ofisiál supervizaun eleitorál na’in-147 hodi prepara superviziona kampaña eleitorál no eleisaun parlamentár tinan 2023.
Diretór CNE Munisípiu Bobonaro, Juvito Ramos, informa antes ne’e rekruta ona ofisiál supervizaun na’in-tolu hamutuk ho funsionariu CNE sira halo supervizaun diária ba atividade Resensiamentu Eleitotrál Atualizasaun Baze de Dadus (REABD) hosi Sekretariadu Tékniku Administrasaun Eleitorál (STAE) ne’ebé lansa iha tersa loron 17 janeiru hodi implementa kobre postu administrativu neen.
Notísia relevante: STAE Bobonaro planeia aumenta sentru votasaun 17 ba eleisaun parlamentár
“Ami mós ba oin tán sei halo rekrutamentu ba ofisiál supervizaun eleitorál ne’e bazea ba estatasaun votu hosi STAE hamutuk 167 sei koloka ba sentru votasaun tuir sentru votasaun idak-idak iha munisípiu Bobonaro,” nia informa ba jornalista sira iha Soso, Maliana, kinta ne’e.
Diretór Juvito subliña, prosesu rekrutamentu ne’e sei hein desizaun ne’ebé aprova liuhosi plenária CNE nasionál.
Tanba ne’e CNE munisípiu Bobonaro sei hein orientasaun hosi nasionál bazea ba planu ne’ebé tradús nune’e bele loke konkursu públiku ba sidadaun hotu-hotu ne’ebé iha interese atu aplika.
“Ami sei rekruta ne’e bazeia ba nível edukasaun sekundária, nakloke ba ema hotu, karik vaga ne’e sé mak iha interese kompete iha vaga ida-ne’e bele lori nia dokumentu mai iha-ne’e tuir kritéria ne’ebé mak ami sei taka iha kuadru avizu CNE nian,” Juvito apela.
Juvito aprofunda ho aumenta rekursu umanu hirak-ne’e maka CNE munisípiu Bobonaro garante katak sei halo supervizaun másimu ba eleisaun parlamentár tinan ne’e.
“Ami-nia supervizaun ne’e sei másimu iha sentru votasaun no estasaun votu, entaun ami garante rekursu ne’ebé ami prepara prontu atu halo servisu hodi fó susesu ba eleisaun Paralmentár 2023,” nia dehan.
Enkuantu preparasaun CNE munisípiu Bobonaro nia ba eleisaun parlmentár tinan ne’e dezde kedas iha tinan 2022 liuhosi atividade edukasaun sívika ne’ebé kuaze konklui ona iha postu administrativu neen.
Maibé iha tinan 2023 bainhira orsamentu aprovadu hosi nasionál sei halo mós edukasaun sívika tuir planu frekuensiamente dalan 15 ho nia alvu mak estudante no komunidade sira hotu.
Entretantu antes ne’e iha loron STAE Munisípiu Bobonaro ohin (19/01) taka ba avizu ba konkursu públiku prosesu rekrutamentu pontu fokál na’in-neen no brigada 147 hodi koloka kada sentru votasaun hotu ne’ebé sei establese. Enkuantu prosesu antendimentu ba kandidatu sira-nia dokumentu sei hahú iha loron-sesta, 20 janeiru no remata iha loron 27 janeiru ne’e.
Notisia relevante: CNE iha planu halo edukasaun sívika maibé sei hein orsamentu
Jornalista : Sérgio da Cruz
Editór : Evaristo Soares Martins
