DILI, 19 janieru (TATOLI) – Espesialista Kardiolojia Hosiptál Nasionál Guido Valadares (HNGV), Herculano Seixas dos Santos, dehan ema moras fuan, iha kauza rua mak afeta, hanesan aterosclerose no la´os aterosclerose.
“Iha kauza rua hamosu atakasaun fuan mak hanesan aterosclerose, no la´os aterosclerose, entaun husi aterosclerose ne’e iha relasaun ho kolestról ka mina ida ne’ebé mak la saudável banhira nia dezenvolve neneik iha ita nia uat ateru koronaria mak kleur ona bele mosu atakasaun fuan”, Espesialista Kardiolojia, Herculano Seixas dos Santos, hateten liuhosi entrevista eskluziva, iha estúdiu Tatoli, ohin.
Nia informa fatór sira ne’ebé mak kontribui dezenvolve kolestról ka mina la saudável iha ema nia uat, mak hanesan fuma, hemu no han hahan la saudável.
“Fuma ne’e nia kontribui 40% atu halo kolestról iha ita-nia isin la saudável ba ita nia uat ne’ebé mak fornese raan ba fuan. Agora hemu tua no han hahan la saudável ida ne’e sai fatór risku ida ba ita nia moris atu kontribui atakasaun fuan”, espesialista dehan.
Nia esplika, hahan ne’ebé durante konsumu hanesan latarias dosi ne’ebé mak ho mina maka’as, ida ne’e mós kauza ida atu hetan moras fuan.
“Bainhira han hahan sira ne’ebé mak iha, depois ita la halo ezersísiu mós bele kontribui atu akontese, agora fatór seluk mak metabóliku hanesan tensaun aas kontribui 60% no mós raan midar aas, bokur demais, ida ne’e fasíl atu heta atakasaun fuan”, nia afirma.
Tuir nia ema ne’ebé atu hetan moras fuan mak idade 40 ba leten, ida ne’e konsidera idade risku atu hetan moras sira ne’e, entaun husi 2% gradualmente, maibé banhira halo idade to´o 70 anos ba leten risku ne’e sae ba 20% atu hetan atakasaun fuan.
Iha estudu balun ne’ebé iha katak iha fatór jenétiku atu hetan moras fuan barak, hanesan fatór risku familiár hanesan grau dahuluk mak avo rasik inan, aman, maun, bainhira sira iha moras atakasaun fuan ita oan ka beioan mós hetan risku 30 to´o 60% atu hetan atakasaun fuan.
”Atakasaun fuan mosu barak iha mane tanba sira mak gosta fuma hemu tua maibé feto sira ladún atu akontese ba ida ne’e, karik sira idade avansadu ona mak hetan kazu komplikasaun hanesan hipertensaun diabetes, entaun ida ne’e nia taxa mortalidade aas”, espesialista relata.
Nune´e mós, la´ós aterosclerose mak hanesan ema sira ne’ebé mak trauma no mós ema sira ne’ebé mak hetan dezastre liuliu ho karreta motor bainhira monu sira-nia hirus matan baku maka’as ida ne’e atu hetan atakasaun fuan.
Nia informa, ema sira ne’ebé hanoin barak ida ne’e mós kontribui atu hetan atakasaun fuan tanba uat ne’ebé fornese raan ba fuan ne’e menus.
Jornalista : Felicidade Ximenes
Editór : Zezito Silva
