iklan

DILI, POLÍTIKA

Governu ho komisaun A hahú diskute alterasaun lei Eleitorál ba PN

Governu ho komisaun A hahú diskute alterasaun lei Eleitorál ba PN

Ministru Administrasaun Estatál, Miguel Pereira de Carvalho. Imajen/ Tatoli

DILI, 19 janeiru 2023 (TATOLI)—Governu ho komisaun A trata asuntu Justisa no Konstituisional iha Parlamentu Nasionál (PN) kinta ne’e, hahú halo diskusaun ba proposta alterasaun lei Eleitorál ba Parlamentu Nasionál.

Notísia Relevante: Aban, komisaun A halo audiénsia públika alterasaun lei Eleitorál ba PN

Nune’e, komisaun A konvida Ministru Administrasaun Estatál (MAE), órgaun eleitorál hosi Sekretária Tékniku Administrasaun Eleitorál (STAE), Komisaun Nasionál Eleisaun (CNE, siglá portugés) hodi hala’o audiénsia públika.

“Ohin, hetan konvite komisaun A nian halo audiénsia ba proposta alterasaun dalimak ba lei Eleitorál Parlamentu Nasionál nian. Governu, iha agostu tinan kotuk, aprova no submete ona mai Parlamentu Nasionál, Deputadu sira halo analiza, ohin loron bolu ami mai halo audiénsia hodi ba iha plenária halo aprovasaun jeneralidade, espesialidade no ikus liu iha finál globál hafoin envia ba Prezidente Repúblika atu promulga,” Miguel Ferreira de Carvalho hateten ba jornalista sira hafoin audiénsia iha PN.

Governu aprova proposta alterasaun ida-ne’e hodi introdús realiza eleisaun parlamentár tinan ne’e, nia objetivu garante lei Eleitorál PN ninia lala’ok hanesan ho saida mak hala’o ona ho eleisaun prezidensiál 2022.

Nia esplika, medida foun ne’ebé Governu introdús iha proposta alterasaun ne’e mak hanesan jornalista bele vota livre bainhira tempu eleisaun hala’o funsaun sira iha ne’ebé de’it.

Medida seluk mak estabelese sentru votasaun paralelu iha eleisaun parlamentár ne’ebé tuir proposta Governu sei estabelse iha Dili de’it, sei estabelese iha fatin tolu, ne’ebé diferensa iha rua kompara ho eleisaun prezidensiál 2022.

Dahuluk mak eleitór ne’ebé mak hakarak rejista ba diretamente iha STAE la presiza liu-hosi universidade, sede suku, Komisaun Funsaun Públika (KFP), no daruak votu sira-ne’ebé mak konta iha sentru votasaun, akta sira ne’e sei envia direta ba iha CNE halo apuramentu nasionál la kontabiliza ona Dili nia votu totál.

“Sentru votasaun paralelu ne’ebé sei estabelese kontinua nafatin iha Dili, maibé eleitór sira ne’ebé mak labele ba sira-nia munisípiu tanba razaun eskola, médiku no sira seluk bele rejista direta iha STAE Dili, la’ós la liu ona hosi sede suku, universidade, Komisaun Funsaun Públika,” nia hateten.

Medida ne’e Governu introdús tanba haree ba iha esperiénsia foin lalais iha eleisaun prezidensiál, lista sira-ne’ebé eleitór sira rejista hosi sede suku, universidade, Komisaun Funsaun Públika (KFP) lato’o ba iha STAE, entaun iha introdusaun ne’e eleitór ne’ebé mak hakarak ba vota iha sentru votasaun paralelu ba diretamente rejista.

Medida foun seluk ba monitor hanesan observadór iha eleisaun no introdús mós sentru votasaun sira loké hosi tuku 06h00 dadér, estasaun votu loké iha tuku 07h00 no taka iha tuku 15h00 lorokraik, ba iha rai-li’ur Governu propoen alterasaun estasaun votu sira loke iha tuku 07h00 dadeersan, sentru votasaun taka iha tuku 20h00 kalan.

“Ba rai-li’ur ita taka tuku 20h00 kalan, nune’e ita-nia sidadaun sira bele hakbesik ba sentru votasaun, Mezmu kalan ona maibé sira bele fó oportunidade ezerse sira-nia direitu votu,” nia hateten.

Governu mós propoin introdusaun votu postal (postal voting) ka votu liu hosi envelope ba eleitór sira-ne’ebé mak resensiadu iha rai-li’ur bele vota liuhosi postal voting.

Ministru ne’e hateten, medida ne’ebé Governu introdús iha proposta alterasaun bainhira aprova mak sei introdús iha eleisaun parlamentár tinan ne’e.

Prezidente Komisaun A, Joaquim dos Santos, hateten proposta lei ne’e importante tau atensaun urjente ba diskusaun hodi aprova antes tama ba eleisaun.

Tanba ne’e, hafoin audiénsia públika komisaun sei hala’o relatóriu paresér, no tuir ajenda komisaun sei hala’o audiénsia konvida mós partidu polítiku sira.

Jornalista : Nelson de Sousa

Editór         : Cancio Ximenes

iklan
iklan

Leave a Reply

iklan
error: Content is protected !!