DILI, 19 janeiru 2023 (TATOLI)—Ministru Administrasaun Estatál (MAE), Miguel Ferreira de Carvalho, hateten Governu preparadu realiza eleisaun parlamentár 2023, bainhira Prezidente Repúblika (PR) dekreta kalendáriu eleisaun.
Notísia Relevante: Horta sei konsulta líder partidu polítiku-Governu marka data eleisaun parlamentár
Ko’alia kona-ba eleisaun parlamentár ne’e, tuir konstituisaun, lei eleitorál Parlamentu Nasionál, kompeténsia PR nian atu dekreta data eleisaun hafoin rona Governu, partidu polítiku iha asentu parlamentár.
“Governu hanesan órgaun ezekutadór aktu eleitorál ninia órgaun eleitorál STAE preparadu atu realiza eleisaun. Preparadu tanba eleisaun ne’e la’ós foin mak hala’o agora, uluk iha tempu defísil mós hala’o eleisaun. Purtantu, ita hein lai Prezidente Repúblika konvoka Governu ho Primeiru-Ministru, partidu asentu parlamentár,” nia hateten ba jornalista sira iha Parlamentu Nasionál, kinta ne’e.
Nune’e, Xefe Estadu sei hola desizaun konstituisionál no parte Governu preparadu asegura realizasaun eleisaun.
Jornalista : Nelson de Sousa
Editór : Cancio Ximenes
