iklan

INTERNASIONÁL, DILI, POLÍTIKA

Horta preokupa ho direitu feto-labarik-saúde materna iha mundu

Horta preokupa ho direitu feto-labarik-saúde materna iha mundu

Prezidente Repúblika, José Ramos Horta, partisipa iha selebrasaun loron mundiál deklarasaun universál direitu umanu ba dala-75 iha Davos, Suísa. Imajen/Midia PR.

DILI, 19 janeiru 2023 (TATOLI)—Prezidente Repúblika (PR), José Ramos Horta, preokupa ho direitu funtamentál hosi feto no labarik inklui saúde materna iha mundu.

Notísia Relevante: PR Horta dezloka ba Suísa partisipa forum ekonómiku mundiál

“Maske ohin loron, atensaun ba direitu umanu aumenta, iha feto no labarik feto barak mak ninia direitu sei nega nafatin, hanesan direitu ba saúde no ai-han, ba ema barak sei laiha. Direitu umanu tun tanba nasaun riku sira-ne’ebé deside destinu hosi nasaun ki’ak sira, laiha meiu atu rezolve situasaun ida-ne’e,” Xefe Estadu hateten liuhosi komunikadu imprensa ne’ebé Agéncia Tatoli asesu, kinta ne’e.

PR Horta ko’alia asuntu ne’e bainhira partisipa iha selebrasaun loroninternasionál ba deklarasaun universál direitu umanu ba dala-75 iha Davos, Suísa.

Tuir Xefe Estadu, tenke hadi’a medida ekonómika hodi tulun nasaun ki’ak sira-ne’ebé afetadu mós hosi COVID-19, hodi bele rezolve problema sub-nutrisaun, saúde materna no garante direitu labarik sira-nian.

“La iha medida konkreta hosi komunidade internasionál hodi rekupera ekonomia hosi nasaun ki’ak sira no rezolve eskravatura labarik. Iha jullu tinan 2022, ha’u hamutuk ho sira seluk husu ba grupu G20 atu fó perdaun ba tusan hosi nasaun ki’ak sira,” nia hateten.

Ramos-Horta fó ezemplu katak, nasaun ki’ak sira hasoru ameasa hosi tusan esterna, hanesan situasaun ne’ebé Srilanka hasoru ho tusan boot hosi Xina, nune’e garantia ba direitu labarik, saúde materna, nutrisaun no asesu ba alimentasaun hetan redusaun no situasaun hanesan ne’e mós akontese iha Afganistaun no nasaun seluk tan.

Relasiona ho situasaun iha Myanmar, Xefe Estadu hateten, kualidade demokrásia tun, tan iha sidadaun koletivu Myanmar balun de’it mak luta ba direitu umanu.

Xefe Estadu mós ko’alia kona-ba servisu ONU nian, iha ne’ebé halo aproximasaun makaas hamutuk ho sosiedade sivíl, hodi halo protesaun ba direitu ba povu minoritáriu sira maske esforsu iha tinan ikus ne’e ladún makaas.

“Bainhira  Sérgio Vieira de Melo (Antigu Administradór Tranzitória ONU nian iha Timor) sei hanesan Altu Komissáriu ba Direitu Umanu, ha’u hato’o ba Sérgio atu ko’alia kona-ba violasaun direitu  umanu. Maske dalaruma ema ida de’it mak mate, ita ba ko’alia ho Amérika no Inglaterra atu ajuda, maibé iha mós rejime balun uza sala kestaun direitu umanu,” Xefe Estadu ne’e dehan.

Entretantu, Prezidente Repúblika, José Ramos-Horta, ba Suísa hodi partisipa iha reuniaun anuál forúm  ekonómiku  mundiál  iha Davos, liuhusi konvite Fundadór no Prezidente Ezekutivu Forum ida-ne’e nian, Professor Klaus Schwab.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!