COVALIMA, 19 janeiru 2023 (TATOLI) – Polisía Nasionál Timor-Leste (PNTL) Covalima, liuhusi Servisu Investigasaun Kriminál (SIK) covalima, entrega sidadaun na’in-ida ba servisu imigrasaun iha fronteira mota masin hodi deporta sidadaun-ne’e ba Indonézia.
Sidadaun na’in-ida ho naran inisiál GB, Unidade Polísia Fronteira (UPF) hamutuk ho Falintil Forsa Defeza Timor-Leste (F-FDTL) kaptura sidadaun ne’e, bainhira ultra pasa liuhosi dalan ilegal mai iha Timor-Leste iha área fronteira iha postu administrativu Tilomar, munisípiu Covalima.
“Covalima ita iha fronteira atividade ilegal iha fronteira loro-loron. Sidadaun sira halo negósiu ilegál entre sidadaun Timor-Leste ho sidadaun Indonezia. kuarta (18/01/23)ne’e, ita deporta sidadaun indonezia na’in-ida ne’ebé halo negósiu ilegal iha ita-nia-rai laran. Ita-nia UFP ho F-FDTL ne’ebé destaka iha fronteira mak kaptura,” Komandante PNTL Covalima, Superintendente Polisia Basilio de Jesus, hateten iha resintu ESGP Suai, kinta ne’e.
Hafoin kaputura sidadaun ne’e, komandu munisípiu nia dever no obrigasaun halo prosesu inisiu hato’o ba Ministériu Públiku (MP) ne’ebé sai na’in ba prosesu, ho nune’e MP mak deside atu deporta sidadaun ne’e ba nia rain ka oinsá.
“Ita kaptura sidadaun ne’e, ita liga ho Ministériu Públiku (MP) hateten tenke deporta ema ne’e liuhosi dalan legál hosi komandu munisípiu entrega ba departamentu servisu imigasaun. Hafoin kontaktu ho imigrasaun Indonézia nian hodi entrega fali sidadaun ne’ebé halo aktu krime iha ita-nia rai,” nia dehan.
Jornalista : Celestina Teles
Editór : Cancio Ximenes
