Servisu Edukasaun Covalima seidauk implementa merenda eskolár
COVALIMA, 19 janeiru 2023 (TATOLI)–Xefe Departamentu Jestaun Programa Edukasaun Covalima, Gregorio Ferreira Afonso, hateten Servisu Edukasaun Covalima seidak bele implementa merenda eskolár 2023 tanba eskola rua mak seidauk entrega lista ba Ekipa Jestaun Programa (EJP).
Notísia Relevante: Implementasaun merenda eskolár iha Covalima sei hahú iha 19 janeiru
“Ita-nia preparasan atu implementa programa merenda eskolár maibé ita-nia ekipa jestaun programa (EJP), to’o ohin-loron eskola rua seidauk entrega lista ho razaun tanba hela dook hosi munisípiu maibé kontaktu ona sira atu entrega. Ita bele konvida autoridade Covalima atu konvida mós finansa nasionál atu fó formasaun ba EJP,” Gregório Ferreira Afonso hateten ba Agência Tatoli iha Santa Rosa, kinta ne’e.
Eskola rua seidauk entrega lista ne’e mak hanesan eskola hosi Suku Dato Tolu, postu administrativu Fohorem no eskola hosi postu administrativu Fatumea, no bainhira iha ona orsamentu mak Ekipa Jestaun programa (EJP) bele hahú implementa programa merenda eskolár.
“Ha’u hanoin estabelese hotu ona EJP no iha ona orsamentu ita bele implementa ona programa merenda eskolár. Agora seidauk fiksu tanba seidauk finaliza estabelesimentu EJP, ita sei hein Fatumea no Dato Tolu,” nia hateten.
Antes ne’e, implementa programa merenda eskolár kada estudante $0,25 sentavu maibé agora ba tinan 2023 iha mudansa ba ona ba $0,42 sentavu, fahe ba $0, 35 sentavu ba alimentasaun no sentavu hitu (7) ba administrasaun.
Implementasaun programa merenda eskolár jere hosi ekipa jestaun programa, servisu edukasaun Covalima halo de’it monitorizasaun ne’ebé sei implementa durante loron 164 nia laran.
Espera eskola hotu ajuda EJP bele implementa programa merenda eskolár no buat hotu EJP mak sei jere, nune’e ekipa pontu fokál tau matan de’it.
“Ami ho administradór sei haruka proposta ba ministériu atu hamenus loron 164 ba loron 150, atu nune’e estudante sira iha eskola Covalima ne’e bele asesu hotu, hahú hosi eskola públiku no eskola katólika sira no eskola pre-eskolár sira,” nia dehan.
Antes ne’e, iha tinan 2022, dadus hosi servisu edukasaun Covalima implementa programa merenda eskolár iha eskola hamutuk 37 ne’ebé kompostu hosi Edukasaun Ensinu Báziku Central (EBC) no pre-eskolár (EPE) privadu no públiku, iha munisípiu Covalima implementa programa merenda eskolár.
Totál alunu EBC ho nia filiál iha Covalima ne’e estudante sira iha totál na’in-14, 283, eskola pre-eskolár públiku ualu (8) ho totál alunu 567 no eskola pre-eskolár privada 10 ho totál alunu hamutuk 458.
Notísia Relevante: Governu aprova programa merenda eskolár
Jornalista : Celestina Teles
Editór : Cancio Ximenes
