OÉ-CUSSE, 20 janeiru 2023 (TATOLI) – Autoridade Rejiaun Administrativa Espesiál Oé-cusse Ambeno (RAEOA) sei halo instalasaun ba bee-matan Oélupun hodi benefísia uma-kain 112 no postu saúde inklui Eskola Bázika Fiíliál (EBF) Bimanu iha bairru Bimanu, aldeia Ulas, suku Taiboko, sub-rejiaun Pante Makasar.
Nune’e atu implementa planu instalasaun ne’e, Prezidente Autoridade RAEOA, Arsénio Paixão Bano, sesta ne’e, vizita direita bee-matan Oélupun, no promete ba komunidade sira, katak bainhira udan para sei dezloka tékniku sira atu halo levantamentu dadus.
Tanba bee-matan ne’e rasik, Autoridade RAEOA serbisu hamutuk ho parseiru dezenvolvimentu Assosiasaun Futuru Foinsa’e ba Sustantabilidade (A-FFOS) liuhosi programa United Nations Development Programa (UNDP,) konsege konstrui ona debu kaptasaun unidade rua ne’e.
“Kuandu bee-matan ne’e la maran, aban bainrua ita bele dada ba bairru Bimanu, dada ba klínika no eskola ne’ebé bee laiha ne’e, komunidade 400-resin durante ne’e ladún asesu bee-moos. Ida-ne’e autoridade promete atu halo, levantamentu sei halo, ita sei hahú uluk ho kaptasaun, tanba kaptasaun ita halo ona tanba bee konserva daudaun ona, depois tau tanki rezerva rai bee,” Arsénio Bano hato’o promesa ne’e bainhira selebra loron reflorestasaun kuda ai-oan iha iha aldeia Ulas Oé-Cusse.
Nia hatutan, bainhira rezultadu levantamentu la’o, bee-matan ne’e la maran, faze tuir mai instala liña eletrisidade tún mai.
Iha biban ne’e, Diretór A-FFOS, Francisco Kato informa, iha área ne’e debu rua, ho medida hanesan naruk metro 15 no luan metru lima no kle’an metru rua.
“Projetu ne’e foin mak dezenvolve maibé nia rezultadu debu ne’e udan para semana rua, maibé bee nafatin no sustenta bee-matan iha okos aumenta tán débitu bee-matan nian,” nia katak.
Nune’e atu garante projetu ne’e nafatin haki’ak bee, A-FFOS serbisu hamutuk ho komunidade suku Taiboko, halo serbisu voluntariamente hahú kuda ona ai-oan heleu kuaze rihun tolu.
Entretantu, konstrusaun debu rua ne’e implementa hosi ONG lokál A-FFOS hetan apoiu hosi Autoridade RAEOA liuhosi programa UNDP no área konservasaun ne’e identifika liuhosi servisu Sekretáriu Rejionál ba Asuntu Agrikultura.
Jornalista: Abílio Elo Nini
Editor: Evaristo Soares Martins
