DILI, 20 janeiru 2022 (TATOLI)—Partidu Frente Revolsionária Timor-Leste Independente (FRETILIN), tuir planu sei realiza konferénsia nasionál durante loron rua hahú hosi loron 04-05 fulan-fevereiru 2023.
Notísia Relevante: FRETILIN sei realiza konferénsia nasionál iha janeiru nia rohan
“Konferénsia nasionál FRETILIN ba dala lima sei hala’o iha 4-5 fevereiru 2023, iha salaun Katedrál Dili,” Prezidente Komisaun Nasionál Preparasaun no Organizasaun partidu FRETILIN, Flávio Maria da Silva, hateten ba Agência Tatoli liuhosi WhatsApp, sesta ne’e.
Antes ne’e, partidu FRETILIN nia kongresu nasionál hala’o ona iha setembru 2022 ne’ebé aprova rezolusaun sei realiza tan konferénsia nasionál hodi diskute ajenda ne’ebé pendente hela hanesan revizaun ba manuál programa polítiku no estatutu, kompromisu eleitorál relasiona ho eleisaun parlamentár 2023 no sei haree mós estratéjia hasoru eleisaun parlamentár.
Nia parte la esplika detallu kona-ba delegadu na’in hira mak sei partisipa iha konferénsia ne’e, maibé kompozisaun delegadu tuir artigu 99 estatutu partidu, mak sira mai hosi orgaun nasionál, koordenadór munisípu no postu, representante Organizasaun Populár Feto Timor-Leste (OPMT, siglá portugés, juventude FRETILIN, veteranu ho sira seluk tan.
Jornalista : Nelson de Sousa
Editór : Cancio Ximenes
