DILI, 20 janeiru 2023 (TATOLI) – Ministru Obra Públika (MOP), Abel Pires, hatete prosesu reabilitasaun estrada Laga-Baguia no Quelicai-Ossú daudaun iha prosesu ba indetifikasaun fatin atu foti rai-henek.
“Agora kompañia iha hela ne’ebá, ekipamentu sira iha dalan hela. Kompañia halo identifikasaun fatin hodi foti rai-henek no fatuk. Ha’u iha komunikasaun diariamente ho ita-nian tékniku sira nomós jestór projetu hosi empreza”, Ministru Abel afirma hafoin relata serbisu ba Primeiru-Ministru (PM), Taur Matan Ruak, iha Palásiu Governu, sesta ne’e.
Governante ne’e agradese ba populasaun sira, liuliu abitante ne’ebé afetadu tanba durante ne’e koopera di’ak tebes to’o lansamentu fatuk dahuluk.
Abel Pires dehan, progresu indemnizasaun ba komunidade afetada sira iha ona pagamentu tanba MOP halo ona transferénsia osan ba Banku Nasionál Komérsiu Timor-Leste (BNCTL, sigla portugés).
“Ne’ebé laiha problema tanba BNCTL hahú daudaun halo pagamentu ba komunidade afetada”, nia adianta.
Governante ne’e prova katak, durante projetu ne’e la’o laiha impedimentu ruma tanba buat hotu loos ona maka Primeiru-Ministru halo lansamentu.
“Garante katak, iha Natál tinan 2023 nian situasaun iha ne’ebá sei la’o oin seluk katak sei iha estrada di’ak”, nia otimista.
Objetivu implementa projetu ne’e tanba Governu hakarak promove konetividade tuir padraun estrada munisipál hodi kontribui ba dezenvolvimentu sósiu-ekonómiku iha área rurál.
Estrada postu Quelicai rasik ho distándia kilómetru 22,7 no luan metru hitu, kompostu hosi aspál metru haat, alargamentu metru id, ombru metru rua, dreinajen, moru protesaun, sinál tráfegu no kuda ai-oan iha fatin risku.
Enkuantu estrada diresaun Laga-Baguia pur volta kilómetru 38 no luan metru neen, empreza konsrutora maks Norinco Internacional Corporation, ho kustu projetu millaun $21,7.
Notísia relevante: Empreza hahú reabilitasaun estrada Quelicai no Baguia fulan ne’e
Jornalista: Antónia Gusmão
Editora: Maria Auxiliadora
