DILI, 20 janeiru 2023 (TATOLI) – Primeiru-Ministru (PM), Taur Matan Ruak, orienta Ministru Obra Públika (MOP), Abel Pires, atu halo reabilitasaun ba estrada sira, liuliu iha munisípiu ba postu, molok Eleisaun Parlamentár 2023.
“Primeiru-Ministru fó orientasaun maka’as liu mak oinsá atu halo manutensaun ba estrada sira, liuliu atu fasilita prosesu eleisaun ne’ebé akontese iha tinan ida ne’e”, Ministru Abel hateten hafoin hasoru malu ho Xefe Ezekutivu, iha Palásiu Governu.
Iha enkontru ne’e, Ministru Abel hato’o mós prosesu reabilitasaun ba estrada sira hanesan, Laga-Baguia no Quelicai.
“Nomós progresu konkursu ba estrada foun sira, hanesan Manatuto liga bá Laclo, Maliana vila ne’ebé iha projetu ba estrada rua, Aileu bá Liquidoe no Alas bá Wedauberek. Konkursu hahú tinan kotuk kedas”, nia dehan.
Tanba Xefe Governu fó atensaun maka’as ba manutensaun estrada, maka daudaun ekipa sira tun ona bá terrenu hodi halo peskiza ba estrada munisípiu Ermera ne’ebé iha pakote tolu ba manutensaun estrada liga Gleno-Letefoho, Gleno-Hatulia no Gleno-Ermera vila.
“Governu sei uza teknoloji foun hodi halo manutensaun ne’ebé sei gasta la to’o millaun $1”, nia garante.
Aléinde ne’e, tékniku sira mós bá ona halo peskiza ba estrada parte Kasa (Ainaro). Ba manutensaun estrada hosi Hatu-Udo bá Kasa no Harekain ne’e kompañia manán-nain iha ona.
“Ha’u mós fó ona orientasaun oinsá mak atu halo manutensaun ba estrada hosi Viqueque bá Natarbora no Natarbora-Betano”, nia konklui.
Jornalista: Antónia Gusmão
Editora: Maria Auxiliadora
