DILI, 24 janeiru 2023 (TATOLI)- Prezidente Repúblika (PR), José Ramos Horta, tersa ne’e, hala’o enkontru ho Primeiru-Ministru (PM), Taur Matan Ruak, hodi ko’alia kona-ba preparasaun ba Eleisaun Parlamentár 2023.
Xefe Ezekutivu hateten Governu apoia tomak desizaun Xefe Estadu nian hodi dekreta loron Eleisaun Lejislativa ne’e.
“Hosi parte Governu nian ha’u garante ba Prezidente Repúblika katak desizaun saida mak Prezidente Repúblika foti”, Taur hateten, hafoin ramata enkontru ho Ramos Horta, iha Bairru Pité.
Matan Ruak afirma katak Governu prontu hodi organiza no asegura eleisaun ne’e sei di’ak hanesan sufrájiu sira ne’ebé realiza ona. “Tanba ne’e momentu ida importante loos iha ita-nian rain, ita konsidera hanesan festa demokrasia entaun festa ne’e tenki organiza didi’ak para labele aat, maibé la’o di’ak to’o ramata”.
Eis-Xefe Estadu ne’e akresenta katak hein de’it desizaun husi Prezidente Horta hodi deside data ba eleisaun. “Agora ha’u labele espekula, ha’u-nian garantia ba Prezidente Repúblika maka Governu sei halo buat hotu, nune’e eleisaun ne’e la’o di’ak”, nia konklui.
Molok dekreta data ba Eleisaun Parlamentár, Prezidente Repúblika sei konvoka uluk reuniaun ho partidu polítiku sira iha tempu badak nia-laran.
Notísia relevante: Xefe Estadu sei enkontru ho partidu polítiku molok dekreta data eleisaun
Jornalista : Antónia Gusmão
Editora: Maria Auxiliadora
