OÉ-CUSSE, 24 janeiru 2023 (TATOLI) – Prezidente Autoridade RAEOA, Arsénio Paixão Bano, informa, prosesu ba projetu estrada nasionál hosi sub-rejiaun Pante Makasar liga sub-rejiaun Oésilo sei implementa iha tinan 2023 no sei asina re-konkursu públiku tanba prosesu hotu kuaze konklui ona.
“Pante Makasar, Oésilo hein de’it ha’u atu asina, iha janeiru ne’e ha’u asina re-tender (re-konkursu públiku) ba estrada nasionál hosi Pante Makasar liga ba sub-rejiaun Oésilo, tanba prosesu hotu-hotu kuaze remata ona,” Arsénio Paixão Bano, hatete, iha Oé-Cusse, tersa ne’e.
Prezidente Autoridade ne’e informa, tuir loloos iha novmebru Primeiru Ministru atu halo lansamentu iha prosesu tomak konklui ona no fó aviza ona ba públiku, empreza PT.Hutama Karya mak sai manán-na’in ba projetu ne’e.
Ho razaun ida-ne’e maka Autoridade RAEOA deside kansela husu fali ba painél sira atu halo avaliasaun hodi responde ba reklamasaun empreza ninian tuir regra aprovizionamentu ne’ebé maka ein-vigór iha Timor-leste ho RAEOA nian rasik.
“Ne’ebé ita hein de’it sei rezolve iha tinan ne’e, tanba projetu ne’e sei hahú ho pakote I hosi eis merkadu Tono to’o suku Bobometo fronteira Napan, Oésilo,” nia katak.
Entretantu, antes ne’e iha loron 05 novembru 2022, bazea rezultadu avaliasaun hosi Unidade Aprovizionamentu Oé-Cusse fó-sai katak, empreza internasionál PT. Hutama Karya mak sai manán-na’in ba projetu estrada nasionál hosi sub-rejiaun Pante Makasar liga ba sub-rejiaun Oésilo.
Ho valór orsamentu ba projetu estrada nasionál ne’e hamutuk millaun $33-resin ($33,591,867.00) hodi reabilita estrada nasionál ne’e hosi Pante Makasar, suku Cunha to’o fronteira Napan, suku Bobometo, sub-rejiaun Oésilo ho distánsia kilómetru 18.
Nune’e mós hosi fundu orsamentu ne’e Autoridade RAEOA prevee hosi Orsamentu Jerál Estadu (OJE) 2022 nian, ho durasaun serbisu durante tinan rua.
Notisia relevante: Autoridade adia hatuur fatuk dahuluk projetu estrada nasionál Pante Makasar-Oésilo
Jornalista : Abílio Elo Nini
Editór : Evaristo Soares Martins
