iklan

DILI, POLÍTIKA

Produsaun lixu iha Dili kada tinan aumenta

Produsaun lixu iha Dili kada tinan aumenta

Trabailodores sira kontinua raut hela lixu neebe komunidade sira soe iha estrada ibun area komoro, tersa 18/12022.Imajen Tatoli/Antonio dasiparu

DILI, 24 janeiru 2023 (TATOLI)—Vise Ministru Administrasaun Estatál (MAE), Lino Torezão, hateten maske kada loron ekipa saneamentu raut lixu iha kapitál Dili maibé produsaun lixu iha kapitál Dili kada tinan aumenta.

Notísia Relevante: Governu prevee millaun $18 mellora jestaun lixu iha Dili

“Mezmu ekipa saneamentu kontinua rekolla lixu maibé sempre nafatin iha lixu nmnkari iha fatin soe lixu antes ekipa ba tula. Kondisaun jestaun lixu barak liu mak populasaun soe iha kontentór laran ne’ebé prepara nu’udar ponte rekolla lixu, tuir mai lixu barak mós halo lakon liu hosi sunu. Lixu balun soe iha baleta, mota no balun hakoi ho seluk tan,” Vise Ministru ne’e hateten liuhosi reuniaun plenária iha Parlamentu Nasionál, tersa ne’e ne’e.

Impaktu hosi lixu lori impaktu negativu ba aspetu saúde ema-nian, ambiente bainhira udan provoka inundasaun.

Governu hamosu medida adekuadu kona-ba depozisaun reziduos solidus iha Dili 237 pontu kolesaun lixu, edifikasaun temporáriu hodi fasilita komunidade soe fo’er no mós iha kontentór hamutuk 212 ne’ebé koloka hodi fasilita komunidade so’e lixu ba.

“Estatístika lixu nian ho númeru populasaun Dili nian ne’ebé tinan-tinan sa’e aas beibeik, rekoilla lixu no transportasaun rezídiuos solidus. Oras ne’e iha kamioneta lima loro-loron tula fo’er karada tolu, veíkulu rua sei di’ak no tolu iha kondisaun aat ona no veíkulu privadu 70 aluga hosi munisípiu Dili hodi tula foer entre karereta rua to’o tolu,” nia dehan.

Vise Ministru rekuiñese, uza traballadór kontratadu sira-nia liman no presiza lori tempu barak mezmu hasoru nafatin risku boot ba sira nia saúde.

Ko’alia kona-ba Dili nia populasaun ne’ebé sempre aumenta, nia parte hakarak konvida ita hotu haree tendénsia produsaun rezídiuos solidus iha Dili ho nia predisaun hosi tinan 2015 to’o 2045.

“Ita hatene katak iha 2015 ho populasaun hamutuk rihun 294 ho nivél produsaun lixu hatudu katak ema ida bele prodús 0.70% kada loron, entaun populasaun rihun 294 kada loron prodús lixu tonelada 190,” nia dehan.

Iha tinan 2018 tonelada 190 sae ba 220, nune’e aumenta hosi tinan ba tinan, iha predisaun iha tinan 2045 populasaun Dili sei sa’e ba millaun 1.118, nune’e ema ida kada populasaun bele produs 0.80%-0.85% lixu kada loron, entaun hosi millaun ida-resin ne’e populasaun prodús lixu iha loron ida tonelada 930 lixu.

Asaun ne’ebé Governu iha daudaun ne’e hahú iha janeiru 2023 lixu iha Dili laran hetan atensaun makaas hosi departamentu saneamentu munisípiu Dili nian, ne’ebé kontrata traballaór 200 hodi dasa fo’er iha estrada sira kapitál Dili nian.

Munisípiu Dili hetan hosi Orsamentu Jerál Estadu (OJE) 2023 aprovadu hamutuk millaun $1-resin.

Notísia Relevante: Konsultan Cowi kapasita membru PMU kona-ba jestaun lixu iha kapitál Dili

Nia atualiza pontu importante tolu progresu atuál lixu iha Dili, Governu liuhosi MAE asina ona kontratu konpañia rua ho kustu millaun $7-resin ba projetu reziduos solidus urbanu hodi hadi’a jestaun lixu liu-liu iha Dili.

Tuir mai kompañia kualifikadu hosi China Harbor Engenering kustu kontratu millaun $1-resin ba rekolla transportasaun lixu, kollesaun lixu, prestaun servisu, dezeñu, konstrusaun, reabilitasaun no mós operasaun nafatin soe lixu destina iha Tibar-Liquiça.

Iha mós objetivu jerál hosi projetu rezíduos solidus no urbanu mak hanesan hadi’a jestaun lixu ne’ebé adekuadu, organiza no prinxe rekezitu sanitáriu, uza teknólojia modernu, hadi’a beleza kapitál Dili, hadi’a paseiu, espasu públiku no redús risku inundasaun, proteje kontaminasaun fo’er ba tasi, hadia ambiente no promove saúde inkluzivamente hadia mudansa klimátika, nune’e bele hamosu mós indústria resiklajen no ikus fó oportunidade servisu ba timoroan sira.

Ba oin iha planu foun ida konsidera nu’udar bainhira hahú implementa ho seriedade, responsabilidade, transparánsia tanba hahú ho planu tarifa lixu nian.

Deputadu KKUNTO, António Verdiál, husu Governu iha planu trata fatin lixu relasiona ho kamada lixu iha kapitál Dili kada loron barak ba nafatin, hamosu kondisaun ladún di’ak ba populasaun inklui komunidade hela iha área Tibár-Liquiça, nune’e nia mós ezije Governu iha ona planu atu kria fatin foun lixeiru ka lae.

Deputadu hosi bankada Governu ne’e husu atu tau atensaun ba pesoál saneamentu sira.

“Operasaun servisu halibur lixu iha Dili laran, haree ita-nia maluk servisu-na’in sira-ne’e bainhira raut lixu dalaruma ka’er liman de’it, ida-ne’e norma seguransa no protesaun pesoál importante ka lae,” nia hateten.

Nia mós destaka kona-ba implementasaun programa edukasaun no sensibilizasaun ba estudante sira hahú hosi ensinu báziku to’o ensinu superiór kona-ba kestaun lixu no limpeza hala’o ka lae.

Deputada CNRT, Maria Fernanda Lay, hateten problema ba jestaun lixu ne’e iha populasaun ka Governu, tanba nota hafoin rekolla lixu populasaun ba so’e fali lixu.

“Bainhira tempu udan ita nota, lixu hosi mota laran sira-ne’e ba mosu hotu iha tasi ibun maibé ami nota bainhira ami sa’e ba foho lolon ne’eba, ema so’e hotu lixu iha mota laran. Seraké Governu la ba rekolla lixu iha fatin sira-ne’eba mak sira so’e iha ne’eba,” nia hateten.

Liga ba plástiku Sekretária Estadu Meiu Ambiente (SEA) iha tinan hirak liu ba konsege rekolla redúsmaibé agora ho tempu anin boot plástiku nakonu iha kapitál Dili liu-liu iha tasi ibun.

“Iha Faról ne’ebá populasaun ba so’e iha lixu fatin ne’ebé aat tiha ona, vise Ministru dehan iha fatin kontetór so’e lixu maibé iha manutensaun ka lae.” Nia hateten.

Deputada KHUNTO, Olinda Guterres, preokupa lixu iha kapitál Dili, sujere hadi’a mekanizmu ba karreta sira tula lixu iha dadeer madrugada labele to’o meudia no karreta lori fo’er ho dignu hodi ba soe.

Notísia Relevante: AMD sei koloka kaixote lixu 2,165 iha kapitál Dili

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!