iklan

NASIONÁL, DILI

AMD sei koloka kaixote lixu 2,165 iha kapitál Dili

AMD sei koloka kaixote lixu 2,165 iha kapitál Dili

Ekipa saneamentu rekolla hela lixu iha Kapitál Dili. Imajen Tatoli/António Daciparu

DILI, 20 janeiru 2023 (TATOLI)—Diretór Departamentu Saneamentu Dili, Herminio Moniz Ribeiro, hateten Autoridade Munisipiu Dili (AMD) promete sei koloka kaixote lixu ne’ebé foun hamutuk 2.165 entre fulan-maiu no jullu tinan ida-ne’e iha kapitálsidade Dili.

Notísia Relevante: AMD sei koloka kaixote lixu 4000 iha sidade Dili

“Ami identifika tiha ona fatin ba tau kaixote lixu sira-ne’e, tanba ne’e ami hakarak sosa kaixote lixu 2,165 ne’ebé 2,020 sei koloka iha bairru sira-ne’ebé susar atu hetan asesu no 145 sei tau iha estrada públiku. Ami asina tiha ona kontratu ida ho empreza China Harbor atu sosa kaixote lixu sira iha rai-li’ur,” nia hateten ba Agência Tatoli, Matadouro, sesta ne’e.

Kona-ba ekipamentu sira, diretór ne’e hatán, Governu liuhosi AMD disponibiliza millaun $7.6 ba akizisaun kaixite lixu (kontentór) sira-ne’ebé tenke iha tipu tolu mak unidade 2,020 ho metru kúbiku ida, 131 ho metru kúbiku ualu no metru kúbiku 14 to’o 20.

Diretor ne’e fó alerta ba komunidade atu kontribui ho asaun konkreta hodi soe lixu sira iha kaixote lixu sira-ne’e no la’ós de’it mehi ba sidade moos maibé ho atitude ne’ebé loos.

PN aprova orsamentu adisionál millaun $2,3 ba jestaun lixu

Entretantu, iha teresa (14 dezembru 2021), reprzentante povu iha uma fukun Parlamentu Nasionál liuhosi debate espesialidade ba proposta lei Orsamentu Jerál Estadu (OJE) 2022 aprova orsamentu adisionál $2.300.000 ba Autoridade Munisipál Dili hodi tau ba programa prioridade ba jestaun lixu iha kapitál Dili ho votu a-favór 43, kontra 0 no abstensaun 15.

Proposta númeru 118 títulu Munisípiu Dili, kategória despeza bens no servisu ho programa kódiku 798 kona-ba bee no saneamentu, dotasaun inisiál $1,308,582 iha alterasaun aumenta $2.300.000, nune’e dotasaun finál sa’e ba $3,608,582.

Notísia Relevante: Sidadaun iha Sidade Dili prodús lixu tonelada 250 kada loron

Ho aditamentu rubrika ba orsamentu ne’e atu hala’o servisu rekolla no transporta lixu ka resíduos sólidos iha sidade Dili relativa hosi lote-1 zona leste no lote-2 zona oeste, halo dezeñu, konstrusaun, reabilitasaun ho jestaun ateru estasaun tratamentu resíduos iha Tibar, no mós fornesimentu ekipamentu ba rekolla resíduos iha Dili ba operasaun iha terenu no estasaun tratamentu.

Proposta ne’e mai hosi proponente Francisco de Vasconcelos (PLP), Joaquim dos Santos (FRETILIN) no Antoninho Bianco (FRETILIN).

Ministru Administrasaun Estatál (MAE), Miguel Ferreira de Carvalho, aseita ho proposta refere ne’ebé propoin aumenta osamentu diretamente servisu munisipál Dili nian, hodi finansia atividade sosa ekipamentu ho konstrusaun infraestrutura ateru lixeiru Tibar.

Governante ne’e dehan, fulan hirak liu-ba Konsellu Ministru (KM) aprova ona konkursu públiku hamutuk hitu (7) ne’ebé atu ajudika empreza bele halo melloramentu projetu jestaun lixu iha kapitál Dili.

Hahú hosi 2016 bazea ba estudu Banku Dezemvolvimentu Aziátiku (ADB) hatudu iha 2020, Dili prodús lixu 260 tonelada, ne’ebé 45% mak transporta ba iha lixeira Tibar-Liquiça no 55% ho ezemplu 33% sunu de’it, soe liu 7%, hakoi 6%, soe iha drainazen 5% no seluk tán.

“Bazea ba polítika ida-ne’e mak Governu hanoin tenke hadi’a melloramentu jestaun lixu iha sidade Dili. Komesa kedas despozisaun lixu, rekola lixu no transportasaun lixu ho tratamentu lixu iha nia destinu final,” nia dehan.

Nune’e, Governu propoin ho polítika refere atu halo mudansa ba jestaun lixu, hanesan daudaun Munisipiu Dili iha kamioneta 49 hodi tula lixu loro-loron oinsá ho forma di’ak liután.

Ho projetu jestaun lixu ne’e sei hadi’a pozisaun lixu sira tau kontentór lixu ka kaixote lixu sira hodi fasilita besik komunidade kada bairru hodi soe fo’er.

“Ita sei tau kontentór ka kaixote lixu ao longo de 178 km argumentu ho dimensaun oioin,” nia dehan.

Notísia Relevante: AMD kontrata kamioneta 50 raut lixu kada loron selu $3.250

Jornalista : Osória Marqeus

Editór       : Cancio Ximenes

iklan
iklan

Leave a Reply

iklan
error: Content is protected !!