iklan

EKONOMIA, BOBONARO, HEADLINE, INKLUZAUN SOSIÁL, MUNISÍPIU, SOSIEDADE SIVĺL

UNIJMA lansa fatin hakiak manu timor no kuda ai-oan iha Lour

UNIJMA lansa fatin hakiak manu timor no kuda ai-oan iha Lour

Uniaun Joventude Maubere (UNIJMA) lansa fatin hakiak manu Timor no kuda ai-oan iha suku Lour, postu administrativu Bobonaro, munisípiu Bobonaro. Imajen espesiál.

BOBONARO, 24 janeiru 2023 (TATOLI) – Uniaun Juventude Maubere (UNIJMA) Pro-RDTL, domingu ne’e lansa fatin hakiak Manu-Timor no kuda ai-oan tipu ‘Au’ iha mini brigada konsentrada setór III, suku Lour, postu administrativu Bobonaro, munisípiu Bobonaro.

Prezidente Organizaun Popular Traballadór Timor (OPTT), Ivo de Jesus Sequeira, esplika objetivu hakiak Manu-Timor tanba Timor-Leste iha poténsia ba rai, bee, ema no ai-haan. Maibé durante ne’e dependénsia liu ba produtu importasaun sira hosi rai-li’ur ne’ebé maioria konserva ho kímika.

Notísia relevante: Kooperativa CDP-RDTL kolleta hare ektare rua iha Matahoi

“Ita tane liman liu ba rai-li’ur, na’an hosi rai-liur kahur ho kímika, entaun halo timoroan barak moras todan baixa nakonu iha ospitál, nune’e alerta ba timor oan hotu, ita iha rai fatin hakiak animál, di’akliu hakiak manu, bibi, fahi no karau nune’e Timor-Leste labele dependénsia ekonomia ba rai-liur,” nia hateten iha intervensaun ba atividade ne’e.

Ivo fundamenta, atividade ne’e nu’udar inisiativa membru CPD-RDTL nia parte ida mós hanesan modelu ka ezemplár ida ba estadu, inklui parte hotu no timor oan sira-ne’ebé hasa’e kursu modernu iha rai-li’ur atu banati-tuir.

“Mai ona ba, imi fila hotu ona ba, imi-nia rai moris fatin, atubele hakiak manu, hakiak bibi no fahi, ita bele sedu ka tarde kore dependénsia hosi rai-li’ur,” nia katak.

“Timor oan tomak hatene de’it maka tesi ai, sunu rai, maibé laiha ema ida mak hanoin atu kuda ai-oan ruma atubele proteje rai,” Prezidente OPTT dehan.

Xefe suku Lour, Miguel Gomes Lopes, agradese no apresia inisiativa hosi membru CPD-RDTL sira-ne’ebé eziste iha suku ne’e inklui iha fatin sira seluk ne’ebé koñese implementa programa rua ne’ebé importante tebes ba povu.

“Ita haree programa ne’e importante, liuliu atu hasa’e ekonomia povu iha suku ida-ne’e nian. Sé bele labele tau liu prioridade ba programa rua ne’e, karik bele aumenta mós programa sira seluk atu nune’e bele ajuda liután ekonomia povu ida-ne’e,” nia katak.

Tuir nia, programa kuda ai-oan iha fatin risku ba dezastre naturál ne’e bele ajuda ona mehi ne’ebe autoridade lokál sira seidauk konsege realiza.

Xefe suku Miguel enkoraja komunidade iha suku Lour inklui mós iha territóriu nasionál atu banati-tuir atividade kooperativa ne’ebé membru UNJIMA sira implementa nune’e bele aumenta seguransa alimentár.

Atividade ne’e partisipa hosi autoridade lokál, membru Ofisiál Polísia suku (OPS) Lour, komunidade no estrutura CPD-RDTL.

Notísia relevante: Prezidente OPTT inaugura “celeiro da resistênsia” CPD-RDTL iha Tapo

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!