iklan

EKONOMIA, BAUCAU, HEADLINE, MUNISÍPIU

Veteranu na’in-hitu iha Baucau seidauk finaliza konstrusaun uma  

Veteranu na’in-hitu iha Baucau seidauk finaliza konstrusaun uma   

Sekretáriu Jerál Konsellu Munisipál Kombatente Libertasaun Nasionál Baucau, Manuel 'Alari' da Costa Soares. Imajen Tatoli/Natalino Belo.

BAUCAU, 24 janeiru 2023 (TATOLI) – Veteranu luta libertasaun nasionál tinan 20-24 hamutuk na’in-hitu hosi munisípiu Baucau ne’ebé hetan subsídiu hosi VIII governu konstitusionál seidauk finaliza konstrusaun uma tanba problema rai.

Sekretária Jerál Konsellu Munisipál Kombatente Libertasaun Nasionál (CMCLN, sigla portugés) Baucau, Manuel ‘Alari’ da Costa Soares, esplika, totál benefisiáriu ba subsídiu konstrusaun uma hosi munisípiu Baucau hamutuk na’in-19 ne’ebé governu konsidera presiza fó apresiasaun liuhosi konstrusaun uma permanente ba sira.

“Sira-ne’e hotu tanba problema rai, ami orienta sira hamutuk ho xefe suku atu koordena malu nune’e bele rezolve ,” Sekretáriu Jerál CMCLN Baucau hateten iha Vila Antiga, tersa ne’e

CMCLN Baucau hetan ona orientasaun hosi ministériu atu koordena ho autoridade lokál hanesan xefe suku no administradór postu hodi fasilita benefisiáriu sira hodi konstrui uma tanba kontribuisaun libertasaun nasionál.

Veteranu na’in-12 ne’ebé finaliza ona kompostu Afonso Malibuti, Sidaputar, Costodio Belo ‘Alin Laek’, Domingos Mausalari, Beredu, Filipe Rai-Lakan, Bure, João Cabral, Salarubi, Tomas Maulesa, Maugadi no Malcom.

Governu liuhosi Ministériu Asuntu Kombatente Libertasaun Nasionál iha tinan-2021 deside veteranu na’in-19 hosi munisípiu Baucau iha faze dahuluk hetan subsídiu orsamentu hamutuk $40.000 ba kada benefisiáriu hodi konstrui rezidénsia privada.

Tuir planu iha faze daruak sei kontinua tán benefisiáriu na’in-lima seluk ne’ebé kontribui ba luta libertasaun nasionál durante tinan-20 to’o 24.

“Laiha limitasaun tempu, importante mak tenke halo uma, hotu fó informa ba konsellu atu fiskaliza no halo relatóriu antes inaugura,” Alari akresenta.

Obejetivu hosi programa refere atu dignifika veteranu sira-nia dedikasaun hafoin iha tinan-1999 Timor-Leste hetan independénsia maibé uma laiha atu hela.

Totál orsamentu ne’ebé prevee ba programa harii uma ba veteranu libertasaun nasionál tinan-20 to’o 24 hamutuk millaun $2,4 ho totál benefisiáriu na’in-96.

Jornalista     : Natalino Belo 

Editór           : Evaristo Soares Martins 

iklan
iklan

Leave a Reply

iklan
error: Content is protected !!