COVALIMA, 25 janeiru 2023 (TATOLI)–Komisaun Nasionál Eleisaun (CNE-sigla portugés) observa atividade Sekretariu Tékniku Administrasaun Eleitorál (STAE) hala’o resensiamentu eleitorál no atualizasaun baze dadus iha postu administrativu hitu (6) iha munisípiu Covalima.
Notísia Relevante: STAE apela ba sidadaun TL partisipa iha resensiamentu eleitorál
“Daudaun ne’e ha’u nu’udar diretór CNE Covalima koloka ona ha’u-nia funsionáriu sira halo observasaun ba atividade resensiamentu eleitorál no atalizasaun baze dadus ne’ebé STAE hala’o iha postu administrativu hitu (7) iha Covalima,” Diretór CNE Covalima, Hermengildo de Sena, hateten ba Agência Tatoli, kuarta ne’e.
Papél CNE importante atu halo supervizaun ba aktu eleitorál ne’ebé hala’o hosi Sekretáriu Tékniku Administrasaun Eleitorál (STAE) hodi halo atendimentu ba sidadaun sira-ne’ebé hasai kartaun eleitorál no hadi’a baze dadus iha postu administrativu sira.
CNE koloka nia funsionáriu observa atividade STAE iha postu administrativu hahú iha loron 17 fulan-janeiru tinan ne’e.
Funsionáriu ne’ebé hala’o servisu iha Covalima hamutuk na’in-sia (9) ne’ebé balun dezkola ona ba postu administrativu sira pertense ba Covalima.
Munisípiu Covalima ho nia postu administrativu sira hanesan Fatululik, Fatumea, Fohorem, Tilomar, Maucatar, Zumalai no Suai ne’ebé ho nia suku 30 no aldeia 148.
Jornalista : Celestina Teles
Editór : Cancio Ximenes
