iklan

NASIONÁL, HEADLINE, SAÚDE

KM aprova rejime jurídiku substitutu susu-been inan

KM aprova rejime jurídiku substitutu susu-been inan

Inan fó susu nia oan iha Ospital Nasionál Guido Valadares, Bidau Dili, sesta (05/08). Imajen Tatoli/Francisco Sony

DILI, 25 janeiru 2023 (TATOLI) – Governu liuhosi reuniaun Konsellu Ministru (KM) aprova projetu dekretu-lei, ne’ebé aprezenta husi Ministra Saúde (MS), Odete Maria Freitas Belo, kona-ba rejime jurídiku substitutu susu-been inan nian.

“Diploma ida-ne’e ho ninia objetivu atu regula komersializasaun, informasaun, publisidade no kontrolu ba kualidade produtu sira ne’ebé destina ona, direta ka indireta, ba alimentasaun laktente [bebé ne’ebé sei susu] no labarik sira to’o tinan tolu”, Ministru Prezidénsia Konsellu Ministru, Fidélis Magalhães hateten, iha Palásiu Governu.

Nune’e, diploma ne’e prosede ba regulasaun substánsia nutritiva no kritériu sira kompozisaun substituisaun susu-been inan nian, estabelese regra sira ba ninia publisidade, define regra sira kona-ba informasaun, rotulajen no embalajen, no hatudu entidade kompetente hirak mak autoriza ba komersializasaun.

“Konsidera katak susu-been inan nian, mak ai-han ideál, ne’ebé importante tebes, ba labarik sira-nian kreximentu no dezenvolvimentu saudavel, bainhira inan sira la fó susu-been ba labarik, ka halo parsialmente, asegura, kualidade substitutu ba ida-ne’e, maibé mós la interferénsia ninia promosaun no distribuisaun ho protesaun ba ai-han inan nian, tuir rekomendasaun husi Kódigu Internasionál  ‘Marketing’ atu Substitui Susu-been Inan nian no rezolusaun subsekuente sira husi Asembleia Saúde Mundiál”, nia esklarese.

Projetu dekretu-lei ne’e prevee kontra-ordenasaun entre rihun $1 no rihun $4, posibilidade iha sansaun sira hanesan lakon objetu pertense sira ba ajente no suspensaun komersializasaun ba produtu.

Alende ne’e, prevee mós kriasaun Konsellu Nasionál Amamentasaun no Nutrisaun Infantíl nian ne’ebé sai hanesan misaun atu apoia Governu nian atu define polítika nasionál promosaun no protesaun aleitamentu inan no ai-han infantíl nian.

Nune’e, sei atua mós iha promosaun atu sensibiliza ba populasaun kona-ba vantajen sira aleitamentu inan nian no obrigasaun atu halo tuir regra sira kona-ba substituisaun no komplementár sira susu-been inan nian.

Notísia relevante: MS planeia kria rejime jurídiku komersializa substitutu susu-been inan

Jornalista: Antónia Gusmão

Editora: Maria Auxiliadora

iklan
iklan

Leave a Reply

iklan
error: Content is protected !!