DILI, 25 janeiru 2023 (TATOLI)—Parlamentu Nasionál (PN) hein Governu aprezenta kandidatu komisáriu Komisaun Antí Korrupsaun (CAC, siglá portugés) hodi bele prosede ba eleisaun.
“Ha’u hatene, tempu badak Governu sei aprezenta kandidatu komisáriu CAC no Parlamentu sei ajenda hodi hili komisáriu foun,” Prezidente Parlamentu Nasionál, Aniceto Longuinhos Guterres Lopes, hateten ba jornalista sira iha PN, kuarta ne’e.
Daudaun ne’e Parlamentu Nasionál seidak simu kandidatu komisáriu CAC nia naran maibé ida-ne’e Governu nia kompeténsia atu aprezenta kandidatu.
Komisáriu Komisaun Antí Korrupsaun (CAC), Sergio Hornai, nia mandatu kompleta ona ne’ebé ramata iha loron 21 janeiru 2023, nune’e agora nafatin hala’o kna’ar hodi hein komisáriu foun.
“Mandatu hotu tiha ona, ha’u hatene, ne’e kestaun legál no instituisaun orsida ami rezolve interna, situasaun ne’e temporáriu,” nia hateten.
Antes ne’e, iha 20 janeiru ne’e, Prezidente Parlamentu Nasionál, Aniceto Longuinhos Guterres Lopes, hala’o enkontru ho Komisáriu CAC, Sergio Hornai da Costa, hodi ko’alia kona-ba lideransa estrutura CAC atuál ne’ebé nia mandatu besik ramata iha tempu badak.
“Ohin, ha’u mai hasoru Prezidente Parlamentu tanba konvokatóriu ida hosi Prezidente ba CAC relasiona funsionamentu servisu balun hala’o durante terseiru mandatu liu-liu iha 2019-2022, ne’ebé liu hosi prosesu eleisaun ida-ne’ebé halo tiha ona iha 15 janeiru 2019, tinan haat liu ba kotuk depois tomada pose akontese iha 21 janeiru 2019, loron ka minutu balun tan komisáriu CAC ninia mandatu sei termina iha 21 janeiru 2023,” Komisáriu Sergio Hornai hateten ba jornalista sira hafoin ramata enkontru iha Parlamentu Nasionál.
Komisáriu ne’e hato’o ba Prezidente Parlamentu ho motivasaun prinsipál oinsá atu bele PN iha kompeténsia ho Governu ne’ebé sei halo proposta ba iha kandidatu atu bele fó kontinuasaun lidera funsionamentu instituisaun ne’e.
“Tanba ita hakarak instituisaun ne’e nia funsionamentu la’o di’ak, hodi nune’e bele jere no administra servisu sira iha investigasaun kriminalidade, servisu administrasaun iha deklarasaun rendimentu bens no interrese deklarante sira ninian no mós servisu prevensaun durante CAC hala’o,” nai dehna.
Sergio Hornai hakarak hato’o agradesimentu ba PN no sosiedade tomak ba apoiu no konfiansa ne’ebé durante ne’e fó nia hodi lidera instituisaun CAC durante mandatu tinan haat nia laran.
Durante sorumutu, Prezidente PN hato’o katak PN iha plena podér lejitimidade atu deside komisáriu CAC foun iha tempu badak.
Komisáriu Sergio relata progresu servisu durante mandatu konstitui arguidu 333 kompeténsia ba órgaun seluk atu halo julgamentu, haree mós prezuiju Estadu ne’ebé konsege halibur osan ba kofre Estadu liuhosi medida prevensaun por volta millaun $7.
“Tanba ita hotu hatene krime korrupsaun komplekisidade, kuantidade la’ós permanente depende kazu ninia prezuiju sira, ita halo exersísiu sira makaas tanba medida prevensaun ninian hanesan iha cesta bázika, distribuisaun subsídiu fim do ano $200, inklui servisu investigasaun kriminalidade,” nia hateten.
Tipu kazu rejista hanesan abuzu podér, krime pekulatu, partisipasaun ekonómika natureza iha krime korrupsaun.
Enkuantu, iha tinan 2022 to’o mai agora rejista kazu korrupsaun hamutuk 120, hosi ne’e 70-resin remete ona ba iha Ministériu Públiku (MP) no restu ho komplesidade kontinua prosesu investigasaun.
Enkuantu, iha kuarta (25/01/2023) ne’e, Governu liuhosi reuniaun Konsellu Ministru (KM), dezigna José da Costa Ximenes ba komisáriu CAC mandatu tinan haat.
Notísia Relavante: Governu dezigna José da Costa Ximenes ba Komisáriu KAK
https://tatoli.tl/2023/01/25/governu-dezigna-jose-da-costa-ximenes-ba-komisariu-cac/
Jornalista : Nelson de Sousa
Editór : Cancio Ximenes
