DILI, 25 janeiru 2023 (TATOLI)– Governu dezigna José da Costa Ximenes ba Komisáriu Anti-Korrupsaun foun (CAC, sigla portuges) ba mandatu tinan haat tuir rejime eskluzividade.
Projetu proposta rezolusaun Parlamentu Nasionál nian ne’e aprezenta husi Primeiru-Ministru, Taur Matan Ruak.
“Tuir lejizlasaun ein vigór, Parlamentu Nasionál sei analiza no vota ba naran ne’ebé hato’o husi Governu, maski ninia dezignasaun sei nesesária ba maioria absoluta husi deputadu reprezentante sira ne’ebé prezente, pelumenus, baluk tolu husi deputadu sira ne’ebé efetividade funsaun sira”, Ministru Prezidénsia Konsellu Ministru, Fidelis Magalhães, hateten hafoin reuniaun Konsellu Ministru, iha Palásiu Governu.
Nia hatutan, karik liuhosi votasaun iha Parlamentu Nasionál maka maioria absoluta konkorda ho kandidatu refere, entaun eis Prokuradór Jerál Repúblika (PGR, sigla portuges) sei sai komisáriu KAK tuirmai.
Governante ne’e esplika, José Ximenes la’ós atu troka maibé tanba mandatu komisáriu atuál KAK, Sérgio Hornay, hotu ona iha 21 janeiru 2023.
Rekorde katak Parlamentu Nasionál fó pose ba Sérgio Hornay, iha 21 janeiru 2019. Iha nia mandatu komisáriu ne’e kompromete katak simu dezafiu no responsabilidade atu dezenvolve KAK ho rigór hodi kombate korrupsaun.
Iha mandatu komisáriu atuál konsege konstitui arguidu 333 ba kompeténsia órgaun seluk atu halo julgamentu no halibur osan ba kofre Estadu liuhosi medida prevensaun ho montante besik millaun $7.
Dezde 2022, KAK rejista kazu korrupsaun hamutuk 120, no hosi númeru ne’e 70-resin remete ona ba iha Ministériu Públiku no restu kontinua iha prosesu investigasaun
Notísia relevante: Komisáriu CAC Sergio Hornai nia mandatu ramata iha 21 janeiru
Jornalista: Antónia Gusmão
Editora: Maria Auxiliadora
