PNTL Covalima hala’o sensibilizasaun lei kontra bandu ba komunidade iha fronteira
COVALIMA, 25 janeiru 2023 (TATOLI)–Komandante PNTL Covalima, Superintendente Polísia Basilio de Jesus, realiza ona sensibilizasaun lei kontra bandu ba komunidade iha fronteira atu halo prevensaun ba sidadaun ultra pasafronteira liuhosi dalan ilegál.
“Ha’u hanesan komandante munisipiu, ha’u mós halo ona atividade hodi halo sensibilizasaun lei kontra bandu ba komunidade iha fronteira, oinsá sira bele kompreende lei kontra bandu sira,” Komandante PNTL Covalima, Superintendente Polísia Basilio de Jesus, hateten ba jornalista sira iha komandu PNTL Covalima, Santa Rosa, kuarta ne’e.
Atividade sensibilizasaun ne’e, komando PNTL Covalima hala’o iha fulan-agosto no to’o fulan-novembru iha tinan 2022 iha postu administrativu sira la’o hahú iha fronteira Tilomar to’o Fatumea.
Atividade sensibilizasaun ne’e hanesan meiu ida atu halo prevensaun ho modelu hakbesik ba komunidade hodi esplika ba sira kona-ba lei kontra bandu sira iha fronteira.
Polísia hala’o atividade sensibilizasaun hodi ko’alia ba sira hanesan sidadaun atu kontribui ba Estadu, la’ós tenke ultra pasa Indonézia ho dalan ilegál hodi kontra lei maibé tenke halo atividade ho dalan legal hodi kontribui reseita ba Estadu.
Ho nune’e, nia dehan, atu redús númeru illegal ne’e dalan ida liuhosi sensibilizasaun maibé depende mós ba ida-idak nia sentidu nasionalizmu hosi povu no joven mane barak liu haree ba feto sira menus liu partisipa atividade ilegál.
Maske komandu PNTL Covalima realiza ona sensibilizasaun, realidade Unidade Patrullamentu Fronteira (UPF) hamutuk ho FALINTIL-Forsa Defeza Timor-Leste (F-FDTL) sira kontinua kada semana halo apreensaun ba sidadaun sira halo movimentu ilegál hodi halo transaksaun liuhosi dalan ilegál hodi hatama sasán sira hanesan sigaru, motoriza manu-futu no seluk tan.
Entretantu, domingu (22/01/23) ne’e, Polísia Unidade Patrulamentu Fronteira (UPF) hamutuk ho FALINTIL-Forsa Defeza Timor-Leste (F-FDTL) sira halo apreensaun ba sigaru saka 18 no sidadaun na’in-haat inklui ho motorista ho nia konjak ho karreta mikrolete ida no motoriza ida.
Notísia Relevante: PNTL Covalima halo apreensaun ba sidadaun hatama sigaru liuhosi fronteira
Jornalista : Celestina Teles
Editór : Cancio Ximenes
