COVALIMA, 24 janeiru 2023 (TATOLI)–Polísia Nasionál Timor-Leste liuhosi Unidade Polísia Fronteira (UPF) hamutuk ho FALINTI-Forsa Defeza Timor-Leste (F-FDTL) halo apreensaun tba abako saku 18 iha aldeia Wetaba, suku Beiseuk, postu administrativu Tilomar, iha Zona Fronteira Haas-Klot entre postu UFP 55 ho postu UFP Beiseuk.
UFP ho F-FDTL halo aprensaun sigaru illegal ne’e akontese iha domingo (22/01/23) no iha segunda (23/01/23) ne’e autoridade relevante labele prosesa tanba loron feriadu, nune’e iha tersa (24/01/23) ne’e komandu PNTL liuhosi unidade investigasaun halo prosesu investigasaun ba sidadaun sira-ne’ebé hatama sigaru jamutuk saku 18 liuhosi dalan ilegál.
“Ha’u hanoin ohin ita iha prosesu ba atividade ilegal ba sidadaun ne’ebé mak hatama sigaru ilegál iha loron domingo horisehik ita la konsege prosesu. Tanba horiseik segunda ne’e feriadu, ohin ita halo prosesu ba sidadaun na’in-haat (4), aumenta kondutór ho konjak na’in–neen (6) hodi hatama sigaru liuhusi dalan illegal,” Komandante PNTL Covalima, Superintendente Polísia Basilio de Jesus, hateten ba jornalista sira, iha komandu PNTL Covalima, tersa ne’e.
Nune’e, Komando PNTL liuhosi servisu investigasaun Covalima halo investigasaun hodi prosesa sidadaun na’in-haat (4) no aumenta ho motorista mikrolete ho nia konjak hodi tula tabako saku 18 ne’ebé sigary ho marka Matahari saku 16 no sigaru Aroback saku rua (2), molok atu kontinua submete ba Ministériu Públiku (MP).
Sigaru saku 18 ne’e, agora daudaun iha ona sela komandu PNTL Covalima ohin loron ita sei submete sigaru ho sidadaun hirak ne’e entrega ba Ministériu Públiku hodi kontinua prosesa tanba polísia la hakotu kazu kiik ka boot iha nivél polísia maibé submete ba MP.
Iha Covalima, nia dehan, postu administrativu sira-ne’ebé iha ligasaun fronteira ho nasaun viziñu Indonezia mak hanesan Fatumea, Tilomar, Fohorem, Fatululik ho Maucatar maibé hosi postu sira-ne’e, postu administrativu Tilomar mak aas liu sidadaun sira halo movimentu atividade ilegál kuaze loro-loron mak hatama mina, manu, motorizada no sigaru.
“Ita kuaze kada semana simu sidadaun ilegál mai hosi fronteira ne’ebé kaptura hosi UPF no F-FDTL maibé ita halo meiu oioin no tenta oinsá atu minimiza no hakalon, maibé sidadaun sira kontinua ultra pasa liuhosi dalan illegal,” nia dehan.
Maske UPF ho F-FDTL halo movimentu iha fronteira durante 24 oras nia laran, maibé sidadaun sira kontinua halo movimentu ilegál ne’ebé mak polísia hetan tenke haruka mai iha komandu PNTL Covalima maibé la hetan entaun sira lori siragu mai iha Suai
“Atu halo prevensaun, polísia sira halo esforsu makaas hodi halo patrulla iha fronteira maibé ita-boot sira hatene postu ida ba postu ida distánsia hanesan postu UPF 55 mai iha postu Beiseuk kuaze kilometru ualu (8),” nia hateten.
Jornalista : Celestina Teles
Editór : Cancio Ximenes
