PNTL Kovalima halo apreensaun ba bebida coca-cola ilegál kaixa 66
KOVALIMA, 05 Novembru 2026 (TATOLI) – Polísia Nasionál Timor-Leste (PNTL) Kovalima liuhusi Servisu Informasaun Polisial (SIP), kuarta-ne’e, halo apreensaun ba bebida kontra bandu hanesan coca-cola kaixa 66, iha Aldeia Busa Kukun, Suku Debos, Postu Administrativu Suai, Munisípiu Kovalima.
SIP prende bebida kontra bandu ne’e bainhira bus ho naran MR.BOLQUY ho xapa matrikula 36834 tula hela pasajeiru atu viajen ba Dili, bainhira SIP ho servisu sekreta halo operasaun konsege prende bebida kontra bandu referidu.
“Ita nia Servisu Informasaun Polisial (SIP) no servisu sekreta prende bebida kontra bandu hanesan bebida Coca Cola kaixa 66 iha tuku 04 madrugada bainhira bus MR.BOLQUY tula pasjeiru atu ba Dili, maibé liuhusi SIP ho servisu sekreta sira halo operasaun hetan bebida kontra bandu hafoin ita nia SIP sira haree no prende” , Komandante PNTL Munisípiu Kovalima, Superintendente Xefe Polísia Paulino Carmo Ferreira ,dehan ba jornalista iha Komandu PNTL Kovalima.
Komandante PNTL Munisípiu Kovalima ne’e dehan, Hafoin deteta sasan kontra bandu SIP sira prende no lori bus ho bebida coca-cola ne’e lori mai iha Komandu hodi halo identifikasaun no asegura iha komandu PNTL munisípiu Kovalima.
“Ita halo ona identifikasaun ba sidadaun sira ne’ebé mak tula bebida kontra bandu iha bus daudaun-ne’e komandu PNTL asegura hela no sidadaun mós iha komandu hafoin ita sei aprezenta prosesu ne’e ba Ministériu Públiku (MP) ”. nia dehan.
Notisia relevante: PNTL halo apreensaun ba sigaru ilísitu kaixa 30, ai-kameli saku ida
Jornalista: Celestina Teles
Editór: Florencio Miranda Ximenes
