COVALIMA, 25 janeiru 2023 (TATOLI)–Dirijente Asosiasaun Vítima hosi tinan 1974-1999, Maria Carvalho Amarál “Biki’ak”, relata progresu konstrusaun Uma Memória Esperansa ba Sovrevivente Julia dos Santos “Alola” iha munisípiu Covalima ne’ebé konstrui iha dezembru 2022 ne’e atinje ona 25%.
Notísia Relevante: CNC sei konstrui “Uma Memória Esperansa” ba sobrevivente Alola iha Covalima
“Konstrusaun Uma Memória Esperansa hahú halo ona konstrusaun no agora nia progresu atinje ona 25% tanba konstrusaun hein tau sinta. Konstrusaun ne’e hahú konstrui iha fulan-dezembru tinan 2022,” Maria Carvalho Amarál “Biki’ak” hateten ba Agência Tatoli iha monumentu Masakre Setembru Negro 1999, kuarta ne’e.
Uma Memória Esperansa ba Sovrevivente Julia dos Santos “Alola” ho nia medida 7×9 ne’ebé lokaliza iha aldeia Asurai, suku Debos, postu administrativu Suai, munisípiu Covalima.
Konstrusaun uma refere ho nia durasaun tempu durante fulan rua (2) ka fulan tolu (3) no sei finaliza hodi bele entrega ba sovrevivente Julia dos Santos “Alola” hodi hela bá.
“Ho nune’e, ha’u nia esperansa katak fulan-fevereiru agora, uma ne’e bele finaliza no hodi entrega ona uma refere ba sovrevivente Julia dos Santos Alola,” nia informa.
Konstrusaun uma refere Asosiasaun Vítima koopera hamutuk ho uma na’in sei atende ba badaen na’in-tolu (3) nia hahan, ne’ebé halo konstrusaun uma memória esperansa ba sovrevivente alola.
Orsamentu ba konstrusaun uma memória esperansa ne’e hosi Centro Nasionál Chega! (CNC) alokadu hosi orsamentu jerál Estadu tinan fiskál 2022, kategoria iha transferénsia públika ho kustu kada uma-ida $12,500.00 ne’ebé kobre ba kustu konstrusaun no badaen mestre sira.
Konstrusaun Uma Memória Esperansa ho nia medida 7×9 ne’ebé kompostu hosi kuartu tolu ho medida 4×3 ho kuartu rua (2) seluk ho medida metru 3×3, sala vizita ida, varanda ida, toilet ida no dapur iha li’ur ho nia odamatan hamutuk neen (6).
Jornalista : Celestina Teles
Editór : Cancio Ximenes
