DILI, 26 janeiru 2023 (TATOLI)—Komisaun A trata asuntu Justisa no Konstituisionál, aprova ona relatóriu paresér proposta-lei númeru 14/V(3a)-Rejime Jurídiku Seguransa Sosiál Tituál Órgaun Soberania, hodi submete ona ba meza Prezidente Parlamentu Nasionál atu bele ajenda diskusaun faze jeneralidade iha plenária.
Notísia Relevante: Komisaun A adia aprova relatóriu parasér alterasaun lei pensaun vitalísia
“Relatóriu paresér ba proposta-lei Rejime Jurídiku Seguransa Sosiál Tituál Órgaun Soberania (alterasaun lei pensaun vitalísia) Deputadu sira iha komisaun aprova ho unanimidade, no iha sesta semana kotuk haruka ona relatóriu paresér ba meza Prezidente Parlamentu Nasionál, agora hein de’it meza ajenda diskusaun iha jeneralidade,” Prezidente komisaun A, Joaquim dos Santos, hateten ba Agência Tatoli liuhosi telefónika, kinta ne’e.
Relatóriu paresér ne’e deskreve katak proposta lei ne’e prenxe rekezitu formal, nune’e Parlamentu Nasionál bele diskute no aprova iha jeneralidade.
Nia dehan, matéria ne’e atu sai ba lei diskutivel rekomenda komisaun iha espesilidade hodi konsidera buat balun tanba liga direitu eis titulár, eis membru Governu, eis Deputadu nune’e tenke diskute didi’ak, labele prezúdika ema-nia direitu no proposta lei ne’e bainhira aprova mak sei halakon tiha rejime agora (lei pensaun vitalisa) integra ba fali seguransa sosiál.
“Iha espesialidade mak ami sei diskute kle’an,” nia hateten.
Kona-ba rejime ne’e nia sistema, regra sira ho artigu hira, Prezidente Komisaun A ne’e, seidauk ko’alia detallu no sei fó sai iha diskusaun tuir mai.
Notísia Relevante: Aniceto Guterres: “Ha’u sei la budu alterasaun Lei Pensaun Vitalísia”
Jornalista : Nelson de Sousa
Editór : Cancio Ximenes
