DILI, 18 janeiru 2023 (TATOLI)—Deputadu iha komisaun A trata asuntu Justisa no Konstituisionál iha Parlamentu Nasionál (PN) la prenxe korum, nune’esira adia aprova relatóriu paresér ba proposta-lei númemru 14/V(3a)-Rejime Jurídiku Seguransa Sosiál Titulár Órgaun Soberania.
Notísia Relevante: Komisaun A ajenda ona diskusaun alterasaun lei pensaun vitalísia
“Tuir ajenda ohin, Rejime Jurídiku Seguransa Sosiál Titulár Órgaun Soberania (alterasaun lei pensaun vitalísia), ne’ebé rejime ida-ne’e ami ohin atu aprova relatóriu paresér haruka ba Parlamentu Nasionál nune’e semana oin bele ajenda ona. Maibé ami ohin laiha korum, ne’ebé aban (kinta 19/01) mak aprova no lorokraik ne’e labele aprova tanba iha reuniaun seluk,” Prezidente Komisaun A, Joaquim dos Santos, hateten ba jornalista sira iha iha PN, kuarta ne’e.
Antes ne’e, komisaun halo ona audiénsia públika ba rejime ne’e ho Governu no entidade relevante seluk hodi halo apresiasaun inisiál, nune’e bainhira relatóriu paresér ne’e aprova ona mak sei submete ba meza Prezidente Parlamentu Nasionál hodi ajenda diskusaun iha plenária faze jeneralidade.
Prezidente komisaun A ne’e esplika, ko’alia kona-ba subsídu sira atu fó ba eis titulár, eis membru Governu, eis deputadu, atu kria rejime ne’e atu haruka hotu ba seguransa sosiál hodi halakon tiha konseitu ida pensaun vitalísia, nune’e rejime bainhira aprova ona vitalísia laiha ona.
“Rejime renumerasaun ne’e bele subsídiu, bele mós pensaun maibé tenke regula iha lei tuir kriteira jerál ho espesiál ne’ebé ema labele trata eis deputadu sira ho eis ministru sira, eis Prezidente Repúblika, eis Primeiru-Ministru, labele hanesan ho funsionáriu baibain, ida-ne’e mak ita tenke regula sira-nia direitu sira,” nia dehan.
Nune’e, rejime ne’e atu halo transferénsia hosi lei ida ba rejime ne’e ba diretu sira hotu kedas balun hasai tiha no balun halo transferénsia trata iha rejime.
Notísia Relevante: Taur: “Partidu ne’ebé ha’u halo parte kontra lei pensaun vitalísia”
“Orsida iha debate espesialidade mak ita sei haree balun, ita simu no balun la simu. Ita tenke prevee norma ne’ebé labele fó prezuiju ba sidadaun sira-ne’ebé kontribui ona ba Estadu no labele mós fó prezuiju ba Estadu. Ne’ebé ita tenke haree regula didi’ak kondisaun atribuisaun ne’e, nune’e ema ne’ebé hala’o servisu labele sala no ema ne’ebé atu hetan benefísiu labele lakon nia direitu tanba konstituisaun prevee,” nia dehan.
Tan ne’e, nia hateten, konseitu hosi rejime ne’e trata regula iha kriteiru sé mak bele hetan no labele hetan no oinsá mak atribui direitu ne’e haruka ba seguransa sosiál implementa, no persentajen regulamentu mak sei ko’alia.
Ezemplu hanesan baibain rejime ida la’o tiha ona seguransa sosiál funsionáriu públiku koa 4% inklui funsionáriu iha empreza privadu desde organizasaun rejista, depois to’o sira pensaun foti sira-nia direitu.
“Ida-ne’e mak bolu seguransa sosiál ne’ebé atu halakon tiha lei pensaun vitalísia ne’e para halo tiha ba rejime, problema iha balun ita sei diskute espesialidade mak haree. Ha’u esplika de’it konseitu jerál ba rejime ne’e no kona-ba nia regra ho nia aplikasaun detallu sei akompaña iha debate faze espesialidade tuir mai,” nia dehan.
Notísia Relevante: Aniceto Guterres: “Ha’u sei la budu alterasaun Lei Pensaun Vitalísia”
Jornalista : Nelson de Sousa
Editór : Cancio Ximenes
