DILI, 12 janeiru 2023 (TATOLI)—Komisaun A trata asuntu Justisa no Konstituisionál iha Parlamentu Nasionál (PN), tau ona ajenda diskusaun alterasaun lei pensaun vitalisa iha fulan-fevereiru tinan ne’e.
Notísia Relevante: Komisaun A promete fó prioridade ba alterasaun lei Pensaun Vitalisia
“Kalendáriu tau ona ajenda hodi diskute iha fulan fevereiru nia laran,” Prezidente Komisaun A, Joaquim dos Santos, informa ba Agência Tatoli liuhosi via telefónika, kinta ne’e.
Antes ne’e komisaun hala’o ona audiénsia públika ho entidade relevante diskute alterasaun lei pensaun vitalisa maibé suspende tiha, to’o agora tanba komisaun presiza regra aplikasaun integra hosi seguransa sosiál presiza submete tan hosi Governu.
“Ha’u hato’o karta ba Governu maibé se la hato’o fali mak ita ajenda ona diskusaun sei la’o nafatin orsida diskute mak ami haree materia,” nia hateten.
Regra aplikasaun, nia fó ezemplu, lei ne’e PN aprova la’o ba oin labele retroativu no direitu ne’e hosi lei ida ba lei seluk tenke tetu didi’ak, no tenke tetu benefisiáriu órgaun titulár la hanesan ho funsionáriu públiku ne’ebé sira mai la’ós tanba regra funsaun públika no mai tanba mandatu, nune’e regra ne’e labele regula hanesan funsaun públika.
Nune’e, norma ne’e PN hasai labele viola fali direitu sidadaun ne’ebé konstituisaun fó no Estadu hakarak atribui direitu ruma tenke tuir lei.
“Tanba ne’e mak ita tenke haree didi’ak no iha diskute mak ita haree, se maiória hakarak hamos ita hamos no maiória fó tenke ho dignu,” nia dehan.
Tan ne’e, hanesan Prezidente Komisaun A ne’ebé organiza de’it diskusaun no konsensu ne’e husu ba bankada Parlamentár ida-idak, nune’e depende bankada sira, se laiha konsensu mak la aprova.
Notísia Relevante: Aniceto Guterres: “Ha’u sei la budu alterasaun Lei Pensaun Vitalísia”
Jornalista : Nelson de Sousa
Editór : Cancio Ximenes
