Dom Virgílio: “Oé-Cusse sei sai dioseze iha futuru”
OÉ-CUSSE, 26 janeiru 2023 (TATOLI) – Don Virgílio Kardeál do Carmo da Silva, husu ba sarani sira iha Rejiaun Administrativa Espesiál Oé-Cusse Ambeno (RAEOA), atu prepara-aan kria kondisaun ne’ebé armónika nune’e iha futuru bele sai dioseze ida tanba relijiaun Katólika hahú tama iha Timor-Leste liuhosi odamatan Lifau.
Tán ne’e atu dignifika realidade ne’e, daudaun ne’e Arkedioseze Dili Metropolitana, hahú destaka padre vigáriu foun ida iha sarani Oé-Cusse atu serbisu hamutuk ho sarani sira, kria kondisaun ba futuru bele sai dioseze ida iha sarani Katólika Timor-Leste.
“Dalaruma ema husu mai ha’u, saida mak dioseze nia mehi kona-bá Oé-Cusse, ikus mai ha’u deskobre katak iha, foin daudaun ne’e, kuandu reprezentante Amu Papa mai iha-ne’e, hala’o enkontru ida ho padre no madre sira, rona sira-nia hanoin saida loos mak sira hanoin kona-bá Oé-Cusse, entaun fila-fali mai ha’u iha mehi boot kona-bá rai O’e-Cusse, hanesan odamatan Igreja Katolika,” Dom Virgílio Kardeál do Carmo da Sílva hato’o mensajén ne’e, iha selebrasaun misa agradesimentu padre pároku foun, Arnaldo Frederico de Deus, iha parókia Nosa Senhora do Rosario Numbei, Oé-Cusse, kuarta ne’e.
Líder Igreja Katólika ne’e, rekoñese Oé-Cusse nu’udar odamatan boot bainhira relijiaun Katólika tama iha Timor-Leste liuhosi Lifau, loos duni katak iha nasaun ida sempre mehi ba uma kreda sarani ninian, hanesan mós mehi ba Oé-Cusse ninian.
“Entaun ha’u-nia mehi iha futuru ba Oé-Cusse, agora ita aguenta ho vigáriu foun ida, maibé tinan ida ka rua tán hosi Oé-Cusse bele ona amu lulik ida bele hili sai vigáriu episkopál, ne’e atu dignifika Oé-Cusse nu’udar odamatan relijiaun Katólika,” nia katak.
Tuir nia, vigáriu episkopál katak, bispu sira bele la mai, padre ida-ne’ebé asumi kargu ida-ne’e, nia mós dalaruma ba tuir enkontru ho bispu no padre sira konsellu episkopál ninian.
“Depois faze tuir mai ita reza no akompaña, ema hotu iha mehi maibé ita tenke kria kondisaun, tanba saida mak Oé-Cusse labele sai dioseze? Ida-ne’e mak ita hahú ona, maibé tenke prepara-aan, presiza rekursu, primeiru rekursu kona-bá rai ema no buat seluk tán, entaun tenke prepara-aan ba futuru,” nia afirma.
Nune’e nia enkoraja sarani sira iha territóriu Oé-Cusse, persiza dezenvolve fé katólika, kria amizade iha sosiedade tomak, tanba bainhira simu ona dioseze Oé-Cusse tenke sai illa dame no pás iha Timor-Leste.
“Tán ne’e hakarak sai dioseze, imi tenke kria kondisaun ne’ebé mínimu, katak hahú prepara agora, tinan lima to’o tinan 10 mak ne’e, Oé-Cusse bele sai dioseze ida, maibé ho kritéria tenke hahú prepara-aan, rekursu importante, segundu ko’alia kona-bá ema terseiru ko’alia kona-bá finanseiru,” nia fó hanoin.
Nune’e presiza hahú hanoin ona, tanba ne’e, dioseze mai soe hela hanesan informasaun de’it, presiza unidade reza servisu hamutuk, nune’e Maromak akompaña hodi respone mehi ne’ebé ita hakarak halo ba rai Oé-Cusse.
“Ne’e duni Dioseze nia planu mak ida-ne’e, ha’u presiza informa ba públiku tanba la’ós segredu ideia sira-ne’e mós informa ona iha reprezentante Amu Papa mai Timor-Leste, katak iha futuru Oé-Cusse tenke dignifika,” nia afirma.
Notísia relevante: Padre Arnaldo de Deus lidera parókia Numbei Oé-Cusse
Jornalista : Abílio Elo Nini
Editór : Evaristo Soares Martins
