DILI, 26 kaneiru 2023 (TATOLI)—Asesór Prinsipál ba Inkluzaun Sosiál iha Prezidénsia Repúblika, Gaspar Afonso, hateten Ema ho Defisiénsia (EhD) matan hamutuk 200 mak prontu atu ezerse sira-nia direitu votu iha eleisaun parlamentár.
Notísia Relevante: Eleisaun parlamentár: STAE-Governu sei kria kondisaun EhD vota mesak
“Ema ho Defisiénsia matan hamutuk 200 prontu ezerse sira-nia direitu votu, nune’e ami husu ba ministériu relevante sira atu aprezenta ami-nia preokupasaun iha sorumutu Konsellu Ministru no Parlamentu Nasionál atu fó sira-nia aprovasaun, nune’e ema ho defisiénsia sira bele iha oportunidade atu ezerse sira-nia direitu ba vota,” Gaspar Adonso hateten ba jornalista sira iha Palásiu Prezidensiál Nicolau Lobato, Bairru Pite, kinta ne’e.
Tuir nia, ema ho defisiénsia matan hamutuk 200 ne’e aprende no hatene ona karta ho modelu iha letra braille, tanba ne’e ema-ne’ebé laiha interrese iha direitu atu vota iha eleisaun parlamentár.
Antes ne’e, Diretór Jerál Sektretariadu Tékniku Administrasaun Eleitoral (STAE), Acilino Manuel Branco, hateten STAE prepara ona referénsia template buletin votu no modelu buletin úniku ba ema defisiensia matan atu bele ezerse sira-nia direitu votu iha eleisaun parlamentár 2023 ne’e.
“Ita iha ona referénsia atu implementa template ba buletin votu no modelu buletin úniku. Ita sei tau template no eleitór sira bele haree no hili ba kandidatura ne’ebé tuir nia konsiénsia rasik. Maibé tenke prevee iha alterasaun, nune’e iha baze legál mak ita tékniku implementa,” bia dehan.
Tanba ne’e , nia dehan, iha alterasaun lei ne’e presiza no nesesáriu hodi prevee atu iha baze legál hodi garante nia ezekusaun tuir lei haruka, tanba membru Parlamentu Nasionál mós kestiona no espera katak iha alterasaun lei eleitoral ne’e bele prevee baze legál balun nune’e bele fasilita lori implementasaun maluk defisiensia matan sira-nia direitu .
Jornalista : Osoria Marques
Editór : Cancio Ximenes
