DILI, 26 janeiru 2023 (TATOLI)–Prezidente Komisaun Funsaun Públiku (KFP), Faustino Cardoso, hateten VIII Governu konstitusionál sei iha fulan-neen (6) atu prosesa dekretu-lei reforma obrigatóriu, tanba ne’e molok eleisaun hahú tenke konklui ona se la konsidera kaduka.
Notísia Relevante: Lejislativa limitasaun idade reforma hein promulgasaun
“Se dekretu-lei reforma obrigatóriu ne’e mak la konsege konklui molok realiza eleisaun, entaun bele lakon ninia validade ka kaduka,” Faustino Cardoso ba Agência Tatoli iha auditóriu koléjiu Polisia Nasionál Timor-Leste (PNTL) Comoro, kinta ne’e.
Nia esplika, bainhira dekretu-lei reforma obrigatóriu ne’e mak la hetan validade ka konsidera kaduka konserteza tenke hein fila-fali Governu foun mai mak kontinua prosesu fila-fali, maibé tenke hahú hosi foun fali liuhosi pedidu sira depois tenke hetan autorizasaun lejislativa hosi Parlamentu Nasionál.
“Ita lakohi atu akontese hanesan ne’e, entaun ita espera VIII Governu bele halo apresiasaun ho kestaun elaborasaun téknika ho lalais no sériu, tanba VIII Governu Konstitusionál sei iha loron 180 ne’ebé konsidera durante fulan neen (6) nia laran tenke halo preparasaun,” nia dehan.
Dekretu-lei obrigatóriu ne’e rasik sei regula kona-ba limitasaun idade kondisaun rekizitu atu tama ba reforma obrigatóriu, hodi nune’e KFP bele hamutuk ho instituisaun Estadu tomak bele hahú implementa.
Nia hateten, funsionáriu públiku ho idade 60 ba leten bele goza ona sira-nia reforma no dekretu-lei reforma obrigatóriu ne’e rasik halo ba funsionáriu públiku hotu hosi nivél nasionál ba to’o iha sub nasionál.
Diskusaun lei reforma obrigatóriu durante ne’e la’o hela maibé ninia prosesu ne’e mak la’o tuir etapa.
Reforma obrigatóriu ne’e tenke haree ho limitasaun idade. entaun tenke haree ba kompeténsia eskluziva ne’ebé ligadu ho diretu umanu, tanba ne’e Parlamentu Nasionál mak iha kompeténsia ba asuntu ne’e.
Entretantu prosesu ba asuntu ida-ne’e la’o tiha ona no lei ne’e hetan tiha ona promulgasaun iha loron 18 janeiru 2023.
Lei ne’e hahú einvigora depois loron ida tama ba promulgasaun, nune’e se lei ne’e mak promulga iha loron 18 janeiru ne’e, lei ne’e komesa entre vigór.
Signifika, tuir nia, iha etapa tuir mai kabe ba Governu atu prosede hosi kontinua elaborasaun téknika ko’alia kona-ba limitasaun idade nia prosedimentu la’o oinsá kondisaun sira oinsá inklui kestaun sira seluk ne’ebé atu regula téknika operasionál hosi dekretu-lei ne’e rasik.
Notísia Relevante:
Jornalista : Tomé Amado
Editór : Cancio Ximenes
