DILI, 27 janeiru 2023 (TATOLI) – Membru Asosiasaun Jornalista Timor-Leste (AJTL) hili Amito Qonusere de Araújo hodi reprezenta asosiasaun ba membru Konsellu Impresa hodi troka Virgílio Guterres ne’ebé rezigna-aan tanba asume fali kargu foun nu’udar Provedór Direitu Humanu no Justisa (PDHJ).
Liuhosi votasaun sekretu, membru AJTL sira deside eskolla Amito Qonusere ho votu 66 no Lírio da Fonseca 38 no votu nulu ida.
Kandidatu eleitu, Amito Qonusere de Araújo, kompormete prontu atu serbí jornalista sira liuhosi knaar ne’ebé nia sei asume.
“Ha’u-nian prinsípiu mak husik nonook no rezultadu mak hatudu ba públiku. Ha’u husu deskulpa ba kandidatu seluk nia apoiante karik iha liafuan ruma naksalak, nu’udar uumanu ita la sees husi sala, maibé ita nafatin ka’er metin prinsípiu jornalizmu nian”, Amito hatete iha diskursu, iha salaun Delta Nova.
Eis-jornalista RTTL ne’e afirma daudaun laiha programa barak atu aprezenta, maibé garante nafatin programa anuál hodi kontinua serbisu ba interese komún.
“Ida ne’e la’ós susesu ba ha’u mesak, maibé ba ita hotu. Sei lahalo separasaun ba jornalista ida ba jornalista seluk”, nia afirma.
Biban hanesan, Prezidente interinu CI, Francisco Simões, kongratula AJTL no CI ne’ebé organiza konferénsia hodi hili membru foun ida hodi substitui fali Vírgilio da Silva Guterres.
“Amito reprezenta jornalista timoroan hotu ne’ebé hala’o knaar hanesan jornalista. Fiar katak Amito hamutuk ho ha’u, mai ita hamutuk tane no serbí de’it ba liberdade imprensa no espresaun. Parabéns mós ba Lírio Fonseca ne’ebé ho korazen hodi kandidata-aan ona iha prosesu ida ne’e”, dehan.
Francisco Simões enkoraja ba órgaun komunikasaun sosiál sira oinsá mak bele garante no tane liberdade imprensa no esperesaun ba nasaun no sosiedade.
Notísia relevante: Prezidente AJTL: Sé de’it eleitu ba CI tenke defende liberdade imprensa no espresaun
Jornalista: Antónia Gusmão
Editora: Maria Auxilidora
