DILI, 27 janeiru 2023 (TATOLI) – Konsellu Imprensa (CI, sigla portugés) organiza konferénsia hodi hili kandidatu husi Asosiasaun Jornalista Timor-Leste (AJTL) ba períodu 2021-2025 atu substitui Virgílio da Silva Guterres ne’ebé reziga-aan iha fulan-dezembru tanba asume fali kargu foun nu’udar Provedór Direitu Humanu no Justisa (PDHJ) ba períodu 2023 to’o 2027.
Iha konferénsia ne’e, Prezidente AJTL, Zevónia Vieira, hatete ba membru sé de’it maka eleitu tenke brani halo debate públiku ba interese jornalista, ba órgaun komunikasaun sosiál no ba liberdade impresa no espresaun.
“Ne’e parte ida hodi defende jornalizmu”, Zevónia Vieira dehan, iha ámbitu konferénsia AJTL, iha salaun Delta Nova.
Na’in ba online Neon Metin ne’e husu mós atu hametin nafatin relasaun tanba papél membru CI mak haforsa no dezenvolve meiu komunikasaun sosiál iha país. “CI labele mesak no asosiasaun sira mós labele mesak. Presiza kria parseiru di’ak ho nasaun sira seluk hodi apoia dezenvolvimentu mídia iha Timor-Leste”.
“Sé de’it mak sei eleitu tenke brani hatete la’e ba polítiku na’in-sira bainhira koko hanehan liberdade imprensa no espresaun. Brani korrije jornalista sira bainhira halo kobertura latuir prinsípiu jornalizmu nian, bainhira lahatudu imparsialidade no prontidaun serbisu hamutuk ho asosiasaun mídia sira”, nia apela.
Responsável ne’e husu mós ba membru AJTL sira atu hili kandidatu ida ne’ebé prontu atu hamriik hodi defende jornalista bainhira hetan problema.
Konsellu Imprensa nu’udar entidade administrativa independente ida ne’ebé halo nia kompeténsia submete ba orientasaun liuhosi oganizasaun ruma ka podér polítiku ida. Atribuisaun prinsipál Konsellu Imprensa nian tuir Lei n.u 5/2015 kona-ba Komunikasaun Sosiál. Iha lei ne’e hateten katak tau-matan no fortifika karteira profisionál jornalizmu nian, sai operadór meiu komunikasaun sosiál no garante jornalista sira halo sira-nian atividade.
Nune’e, CI nia misaun lasees hosi vizaun no misaun AJTL hodi promove liberdade imprensa no espresaun hanesan fundadór sira harii ona iha tinan hirak liubá, katak promove indepedénsia meiu komunikasaun sosiál, asegura jornalista sira hodi hala’o sira-nian atividade jornalístika, promove no garante kualidade jornalizmu.
AJTL sai parseiru di’ak ho CI hodi haree asuntu importante sira, katak pertinente loos atu promove liberdade imprensa no espresaun, tanba ne’e parte hosi direitu umanu, halo advokasia kona-ba independénsia editoriál hodi asegura jornalista sira bainhira halo kobertura iha fatin públiku sira, kontinua hasa’e kapasidade membru sira hodi hasa’e kualidade no intelektualidade, inklui sira-nian kapasidade atu halo debate públiku ba asuntu direitu umanu.
“Sé mak prontu atu troka Vírgilio Guterres hodi kontinua halo debate públiku ne’ebé ita sei enfrenta iha rede sosiál, halo advokasia, halo parseria di’ak ho parseiru nasionál no internasionál sira no kontinua hametin regra sira iha Sudeste Aziátiku hodi dezenvolve mídia iha Timor-Leste. Ida ne’e esperansa boot hosi AJTL iha konferénsia ida ne’e”, nia afirma.
Nu’udar Prezidente AJTL, Zevónia enkoraja membru sira ne’ebé prontu atu kandidata-aan ka ema sira ne’ebé mak membru sira prefere ne’e nakloke ba hotu tuir estatutu AJTL nian, tantu membru komu fundadór sira ne’ebé mak iha karteira profisionál no lasees hosi kritériu ne’ebé CI aprezenta.
Molok konfrensista sira aprezenta kandidatu, Diresaun Apoiu Jurídiku CI halo uluk esplikasaun ligadu ho baze legál sira hanesan estatutu AJTL nian.
Iha kandidatu rua mak konfrensista sira propoin hanesan, Lírio da Fonseca, nu’udar Fundadór AJTL ho propronente 33 no Amito Araújo, hanesan membru ativu AJTL ho apoiante 53.
Notísia relevante: Virgílio rezigna an, CI indika Francisco Simões sai prezidente interinu
Jornalista: Antónia Gusmão
Editora: Maria Auxiliadora
