DILI, 27 janeiru 2023 (TATOLI)—Komisaun A trata asuntu Justisa no Konstituisional submete ona relatóriu paresér ba proposta alterasaun lei Eleitorál ba Parlamentu Nasionál (PN) ba meza Prezidente Parlamentu Nasionál.
Notísia Relevante: Governu ho komisaun A hahú diskute alterasaun lei Eleitorál ba PN
“Ami aprova tiha ona relatóriu paresér, iha sesta semana kotuk submete ona ba meza Prezidente Parlamentu Nasionál, hodi ajenda diskusaun iha jeneralidade iha plenária,” Prezidente Komisaun A, Deputadu Joaquim dos Santos, hateten ba Agência Tatoli iha PN.
Relatóriu paresér ne’e hafoin komisaun halo apresiasaun inisiál no audiénsia katak proposta alterasaun lei ne’e prenxe rekezitu formál hodi bele diskute no aprova iha jenaralidade.
Relatóriu ne’e halo hafoin rona tiha entidade sira kona-ba atualizasaun dadus, buletin votu, ko’alia mós sentru votasaun paralelu, fiskál sira-nia preparasaun, aumenta estasaun votasaun no iha mós proposta balun hosi deputadu sira ko’alia kona-ba barreira atu hetan iha asentu parlamentár dadaun 4% atu aumenta ka lae.
“Ida-ne’e mak materia ami rekomenda iha relatóriu laran no iha mós proposta balun hosi Deputadu sira atu diskute kle’an liután iha espesialidade,” nia hateten.
Antes ne’e, komisaun A konvida Governu liuhosi Ministru Administrasaun Estatál (MAE), bankada parlamentár sira hodi halo audiénsia públika ba proposta alterasaun lei refere hodi rona sira-nia hanoin.
Jornalista : Nelson de Sousa
Editór : Cancio Ximenes
