DILI, 27 janeiru 2023 (TATOLI)—Komisaun G trata asuntu Edukasaun, Juventude, Kultura no Sidadania iha Parlamentu Nasionál (PN), hala’o fiskalizasaun ba iha munisípiu Ermera hodi rona lamentasaun kona-ba implementasaun bolsa méritu hosi hosi diretór edukasam hosi Ministériu Edukasaun Juventude no Desportu (MEJD).
Notísia Relevante: Membru PN preokupa ba implementasaun bolsa méritu
“Komisaun nia fiskalizasaun iha Gleno atu rona diretamente informasaun hosi baze liu-liu hosi Diretór Edukasaun sira, kona-ba prosesu bolsa méritu,” Sekretária komisaun G, Deputada Gabriela Alves, hateten ba jornalista sira iha PN, sesta ne’e.
Programa Governu bolsa méritu atu motiva estudante timoroan hotu estuda hodi bele iha kapasidade no kualidade, maibé realidade iha Ermera bolsa méritu problema uitoan tanba tuir informasaun Diretór Edukasaun nian katak koordenadór eskola sira ba troka tiha naran estudante ne’ebé mellor klasifikasaun, sira-nia lista troka tiha kuandu lista mai to’o nasionál depois haruka fila-fali mellór estudante sira naran laiha.
Durante iha terrenu, Deputadu sira rejista lamentasaun refere, mezmu ne’e seidauk hetan dadus loloos.
“Bolsu méritu iha Ermera seidauk hetan dadus konkretu maibé tuir informasaun ne’ebé mak hosi Diretór Edukasaun katak eskola balun Diretór sira halo manipulasaun ba ema-nia naran,” nia hateten.
Tanba, nia dehan, programa bolsa méritu atribui ba estudante ida-ne’ebé mak hetan kalsifikasaun tenke hetan bolsa méritu.
“Bolsa méritu ne’e ba estudante ne’ebé mak iha kapasidade, la’ós ba ema kbiit laek depois troka naran tun sa’e,” nia dehan.
Komisaun G sei prepara relatóriu hodi rekomenda ba Governu hodi tun halo investigasaun ba preokupasaun refere hodi labele iha manipulasaun.
Komisaun mós simu preokupasaun hanesan hosi munisípiu seluk, nune’e tuir planu sei hala’o fiskalizasaun ba iha munisípiu Ainaro, Covalima no Lautém.
Jornalista : Nelson de Sousa
Editór : Cancio Ximenes
