iklan

DILI, HEADLINE, POLÍTIKA

Membru PN preokupa ba implementasaun bolsa méritu

Membru PN preokupa ba implementasaun bolsa méritu

Estudante eskolár iha Eskola ESG 4 Setembru UNAMET Balide. Imajen TATOLI/Egas Cristóvão

DILI, 24 janeiru 2023 (TATOLI)–Membru Parlamentu Nasionál (PN) preokupa ba  implementasaun bolsa méritu hosi Ministéiru Edukasaun Juventude no Desportu (MEJD) ba estudante sira-ne’ebé hetan mellor klasifikadu.

Notísia relevante: Estudante 3.517 tama lista mellór klasifikadu atu simu prémiu bolsa méritu

“Asuntu edukasaun agora sai preokupasaun boot ida ba ita-nia populasaun nia leet liu-liu kona-ba bolsu méritu. Ha’u lahatene ministériu iha ona kriteiru ruma kona-ba bolsu méritu ne’e ka lae. Tanba, to’o agora estudante barak ne’ebé hetan valór di’ak ne’e, depois haruka tiha mai ministériu sira konfere tiha fila-fali ba taka sai tiha ona, ema hatene tiha ona katak nia hetan valór di’ak, nia hetan ona rekoñesimentu. Depois segundu lista fila-fali ba atu loke konta bankária atu hetan osan, ema sira-ne’ebé hetan klasifikasaun prrmeiru, segundu no terseiru ne’e kuaze naran laiha no ema seluk mak naran iha fali,” Deputadu Fretilin, Dario Madeira, hateten liuhosi reuniaun plenária PN, segunda ne’e.

Tan ne’e, nia dehan, bainhira Governu liuhosi MEJD atu atribui bolsu méritu ba estudante mellor klasifikadu iha territótiu nasionál ne’e tenke define kriteiru ho didi’ak.

“Se fó ba ema méritu kbiit laek nia oan, entaun ko’alia ida nune’e no ema labele kria konfuzaun  iha kraik. Tanba sai konfuzaun bo’ot, balun funsionáriu nia oan hetan tiha bolsu tanba nia valór di’ak. Depois ba fali esplika inan-aman funsionáriu ona labele hetan, ida ne’e ita atu motiva ema ka halo oinsá labarik sira estuda ne’e ka lae,” nia dehan.

Deputadu bankada Governu ne’e husu ba Ministéiru Edukasaun Juventude no Desportu (MEJD) atu solusiona tanba problema ne’e akontese iha fatin barak.

Deputadu CNRT, Patrocínio Fernandes, reforsa antes ne’e iha debate proposta Orsamentu Jerál Estadu (OJE) 2023 iha PN, nia parte kestiona kona-ba polítika bolsa méritu ne’e.

“Ha’u foti ona problema ne’e, tanba ne’e iha ona indísiu manipulasaun hato’o ba ministru atu define didi’ak polítika ida-ne’e. Agora preokupasaun ne’e kuaze hosi territóriu hotu, tanba ne’e sujere ba komisaun G (trata asuntu edukasaun) no ministru se bele fó hatene. Di’akliu loke investigasaun ida haree ba iha parte kuríkulu ministéiru nian hodi tun ba to’o mós iha munisípiu sira,” nia hateten.

Tanba informasaun sira ne’ebé tama mudansa sira-ne’e mai iha kuríkulu ministéiru ninian no depois mosu mudansa sira-ne’e, estudante ne’ebé naran hetan klasifikasaun aprezenta hotu dadus mai ministéiru, hafoin lista tun fila-fali ba sira-ne’e naran laiha fali maibé mosu fali ema seluk nia naran.

Prezidente Komisaun G trata asuntu Edukasaun iha PN, António Verdiál de Sousa, fó sai katak komisaun sei tun ba iha terrenu hodi halo fiskalizasaun ba iha munisípiu sira-ne’ebé identifika ona.

“Tanba informasaun ne’ebé ami rona no realidade dadus balun iha ha’u-nia liman, hatudu alunu ne’ebé ho valór boot la hetan fali no alunu valór ki’ik mak hetan fali bolsu méritu. Tuir ha’u hatene, ema-ne’ebé merese atu hetan bolsu méritu valór boot mak hetan. Tanba ne’e hanesan deputadu husu sira labele dun malu, se bele haree dadus loloos atu fó duni direitu ba estudante sira mak merese atu hetan,” nia dehan.

Hatán ba preokupasaun ne’e, Ministru ba Asuntu Parlamentár no Komunikasaun Sosiál (MAPKOMS), Francisco Jerónimo, hateten bolsa méritu ne’e la’os ba ema kbiit laek tanba programa ba kbiit la’ek ne’e iha tiha ona, hanesan programa ba ita-nia oan hosi kombatente libertasaun nasionál.

“Agora bolsa méritu ne’e ba oan sira-ne’ebé mak iha kapasidade, bainhira hatudu iha ezame ne’ebé hetan mellor klasifikasaun primeiru, segundu no terseiru lugar mak hetan bolsa méritu ida-ne’e. Tan kona-ba dadus ne’e sei hato’o ba Ministéiru Edukasaun hodi halo duni investigasaun,” nia hateten.

Notísia relevante: MEJD prevee millaun $7,2 atu atribui ba estudante mellor klasifikada

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!