DILI, 30 janeiru 2023 (TATOLI)–Vise Reitór Universidade Nacional Timor Lorosa’e (UNTL) trata asuntu Akadémiku no garantia kualidade, Samuel Venâncio de Sousa Freitas, hateten estudante UNTL kuaze 47% hosi totál rihun 21-resin ne’ebé tama iha rejime pre-inskrisaun hosi tinan 2001 to’o 2014, sei termina sira-nia prosesu re-inskrisaun iha fulan fevereiru tinan ida-ne’e.
Notísia Relevante: Estudante pre-inskrisaun balun hasoru ona Vise-Reitór UNTL hodi hahú prosesu admisaun
“Ita iha totál estudante ne’ebé tama iha rejime admisaun ka drop out ne’e hamutuk rihun 21-resin ekivalente kuaze 47% mak UNTL hein hela sira-nia prosesu re-inskrisaun atu mai tuir fali prosesu normál, tanba ninia prosesu sei termina iha 2024 maibé ba tinan ida-ne’e sei iha tempu to’o inísiu fevereiru,” Samuel Venâncio de Sousa Freitas ba Agência Tatoli iha ninia kna’ar fatin kampus UNTL, Caicoli, segunda ne’e.
UNTL simu ona pedidu hosi fakuldade oioin no barakliu mak hosi fakuldade siénsia sosiál ema sira-ne’e balun mai hatama ona pedidu individual, balun hosi grupu maibé seidauk iha númeru fiksu ema na’in hira mak mai tuir ona prosesu ne’e.
Dadus sira-ne’e sei fó sai bainhira kuandu inskrisaun ramata iha fulan oin molok hahú aula mak sei konfirma atu hatene totál estudante hosi rejime pre-inskrisaun tinan 2001 to’o 2014 ne’e na’in hira mak mai ona rejista.
“Prosesu komesa la’o ona maibé to’o agora ita seidauk iha dadus ida atu identifika estudante na’in hira ne’ebé tama iha situasaun pre-inskrisaun ka DO na’in hira mak regulariza ona situasaun. Tanba UNTL iha 2022, iha alunu ne’ebé identifikadu hamutuk 24.095 maibé iha rihun 21-resin mak la mai halo rejistu. Tanba ne’e sei iha oportunidade to’o fulan oin ba sira,” nia dehan.
Tanba prosesu drop out (DO) ka rejime pre-inskrisaun ne’e refere ba alunu sira-ne’ebé tama foun liu-hosi prosesu matrikula, maibé to’o momentu ida bainhira estudante ne’e iha tempu barak husik hela ninia estudu hodi ba tiha rai dook la konsege konklui ninia kursu ruma, entaun ninia matrikula ne’e bele lakon.
Ho nune’e, parte universidade haree katak karik estudante ne’e lakon de’it ninia direitu ba matrikula, entaun presiza regulariza liu hosi avizu ne’ebé Universidade fó sai ona iha tinan kotuk ba estudante ne’ebé lakon sira nia direitu ba matrikula bele mai halo fali re-inskrisaun.
Maibé prosesu regularizasaun ne’e sei mosu de’it iha tempu ne’ebé inskrisaun no re-inskrisaun atu nune’e bele regularizasaun ba prosesu DO ka rejime preskrisaun ne’ebé liu-hosi re-admisaun atu re-admite fila-fali ba eskola.
Tanba ne’e, nia dehan, prosedimentu ba pedidu re-admisaun hosi estudante sira-ne’ebé tama iha rejime preskrisaun ne’e tenke liu uluk hosi kada fakuldade depois mak submete mai gabinete vise reitór trata asuntu akadémiku no garantia kualidade, hafoin haruka lista sira-ne’e ba dirasaun jerál servisu administrasaun akadémiku atu hetan apresiasaun.
Enkuantu estudante sira ne’ebé tama iha rejime pre-inskrisaun sei halo inskrisaun filafali iha fakuldade ne’ebé uluk ninia eskola ba hodi kontinua filafali ninia estudu tuir semestre anterior. Maibé kuandu nia hakarak transfere fali ba fakuldade seluk presiza hetan koñesimentu hosi fakuldade atu nune’e bele fasilita estudante ne’e iha ninia prosesu tomak.
Agora finál ba prosesu DO sira atu halo inskrisaun ne’e sei taka iha tinan oin fevereiru 2024, signifika ba tinan ida-ne’e prosesu inskrisaun hahú iha janeiru ba semestre dahuluk nian, ne’ebé agora inskrisaun ba semestre inpar maibé kuandu sira la konsege iha semestre ida-ne’e sei simu fali ba semestre par, tanba tinan ida-ne’e iha semestre haat mak permite sira atu halo re-admisaun.
“maibé data ne’ebé termina sira atu entrega dokumentu sira tenke iha fevereiru fulan oin. Ne’ebé dokumentu sira-ne’e importante mak pedidu atu hahú eskola iha ne’ebé depois ultima transkrisaun valór inklui resibu, atu nune’e bele garante katak estudante ne’e uluk eskola duni iha UNTL,” nia dehan.
Jornalista : Tomé Amado
Editór : Cancio Ximenes
