DILI, 30 janeiru 2023 (TATOLI)– Ministru Finansa (MF), Rui Augusto Gomes, hatete Governu ezekuta ona, iha jeneiru, Orsamentu Jerál Estadu (OJE) 2023 hamutuk millaun $40.
“Relata progresu serbisu Ministériu Finansa nian, liuliu ezekusaun orsamentál tinan 2023 nian ba Primeiru-Ministru. Dala barak ema dehan sei labele ezekuta, maibé iha fulan-janeiru ne’e konsege ezekuta ona millaun $40”, Rui Gomes dehan, iha Palásiu Governu.
Orsamentu ne’e ezekuta ona hodi selu saláriu veteranu, inklui viajen estranjeiru no lokál sira no ba kategoria saláriu no vensimentu, enkuantu ba programa prioridade Governu nian ne’ebé prevee iha OJE 2023 seidauk. “Signifika katak sistema ne’e funsiona hela”, Rui afirma.
Kestiona kona-ba saláriu ba funsionáriu kontratu sira nian iha janeiru 2023 ne’ebé tama tarde, governante ne’e esklarese katak semana kotuk Ministériu Finansa bolu ajente sira hosi entidade públika tomak atu esplika ezekusaun OJE tinan ne’e nian tanba iha mudansa uitoan iha parte téknika.
“Hosi esplikasaun sira ne’e barak liu komprende ona no aplika daudaun. Espera katak iha fevereiru situasaun ne’e larepete tan. Ba saláriu fulan-janeiru nian tama ka seidauk depende ba departamentu finansa kada entidade públika. Bainhira halo ajustamentu lalais bele ezekuta tanba sistema nakloke dezde loron 05 janeiru”, nia esplika.
Antes ne’e, Parlamentu Nasionál aprova ona, iha loron 17 novembru 2022, proposta-lei númeru 46/v (5a) OJE 2023 billaun $3,16 iha finál globál no iha loron tuirmai haruka kedan ba Prezidente Repúblika, José Ramos Horta.
Proposta-lei ne’e kompostu hosi orsamentu administrasaun sentrál biliaun $2,8 (montante ne’e inklui ona Fundu Kombatente Libertasaun Nasionál biliaun $1), orsamentu seguransa sosiál millaun $235,7 no Rejiaun Administrativa Espesiál Oé-Cusse Ambeno (RAEOA) millaun $120.
Maibé, antes halo promulgasaun ba proposta ne’e, Xefe Estadu hato’o pedidu ba Tribunál Rekursu hodi halo fiskalizasaun preventiva ba fundu veteranu no ikus mai desizaun Tribunál fó sai katak fundu ne’e inkonstituisionalidade.
Nune’e iha dezembru tinan kotuk, Prezidente Repúblika promulga lei OJE ne’e hosi montante inisiál biliaun $3,16 ba iha biliaun $2-resin.
Orsamentu ne’e atu finansia programa 45 liuhosi atividade prinsipál 275, organizadu iha área estratéjiku 16 ne’ebé Governu sei foku ba iha tinan oin hanesan agrikultura, pekuária, peska no Floresta, ekonomia no empregu, turizmu, dezenvolvimentu rurál no abitasaun, ambiente, petróleu no minerál, eletrisidade no enerjia renovável, konektividade nasionál, bee no saneamentu, edukasaun no formasaun, saúde inkluzaun no protesaun sosiál, kultura no patrimóniu, reforma Estadu, defeza no seguransa nasionál, relasaun internasionál no polítika esterna.
Notísia relevante: Ezekusaun OJE 2023 iha semana datoluk janeiru ho valór $282.535
Jornalista: Antónia Gusmão
Editora: Maria Auxiliadora
